1. Sa a‘u fa‘apea atu fo‘i: Fa‘afofoga mai ia ‘outou matai o Iakopo ma ‘outou faipule o le ‘āiga o Isaraelu, E lē o ‘iā te ‘outou ‘ea ‘ona iloa le fa‘amasinoga?
2. O ‘outou, o lo‘o ‘ino‘ino i mea lelei ma fiafia i mea leaga, o lo‘o ‘outou sae ‘ese o latou pa‘u, ‘atoa ma ‘a‘ano i o latou ivi.
3. O ē ‘a‘ai fo‘i i tino o lo‘u nu‘u ma sae‘eseina o latou pa‘u ma gauia o latou ivi, e vaevaea lava pei o mea e tu‘u i le ‘ulo, pei o tufa‘aga fo‘i i totonu o le pani.
4. ‘Ona latou ‘alalaga atu ai lea i le ALI‘I, ‘ae lē fa‘afofoga mai ai o ia ‘iā te i latou; ‘ae ‘alo ‘ese ona fofoga ‘iā te i latou i ia lava ona po, auā ‘ua leaga lava a latou mea e fai.
5. O lo‘o fa‘apea mai le ALI‘I i perofeta o ē fa‘asesē i lo‘u nu‘u, o ē feū i o latou nifo ma latou ‘alalaga atu, “O le manuia,” a o le ‘ua lē avane mea i o latou gutu latou te sauni lava le tau‘a ‘iā te ia.
6. O le mea lea e pogia ai ‘outou ma le leai o se mea e va‘aia, e o‘o fo‘i le pouliuli ‘iā te ‘outou ma le leai o se ‘i‘ite; e goto fo‘i le lā i ia perofeta, e pogisā fo‘i le ao ‘iā te i latou.
7. ‘Ona māsiasi ai lea o tagata va‘ai, e femēmēa‘i ai fo‘i o ē ‘i‘ite; latou te ufiufi fo‘i ‘iā latou ‘ava, o i latou uma lava, auā e leai se tali mai le Atua.
8. ‘Ae peita‘i o a‘u, e moni lava, ‘ua fa‘atumuina a‘u i le mana e le Agaga o le ALI‘I, o le fa‘amasinoga fo‘i, ma le malosi, e fa‘ailoa atu ai ‘iā Iakopo o lana solitulafono, e fa‘ailoa atu fo‘i ‘iā Isaraelu o lana agasala.
9. ‘Inā fa‘afofoga mai ia i le mea nei o ‘outou matai o le ‘āiga o Iakopo ma ‘outou faipule o le ‘āiga o Isaraelu, o ē ‘ino‘ino i le fa‘amasinoga ma fa‘api‘opi‘o i mea tonu uma;
10. O ē ati a‘e Siona i le toto ma Ierusalema i le amio leaga.
11. O lona matai ‘ua latou fa‘amasino i le fia fai taui, o ana ositaulaga fo‘i ‘ua latou a‘oa‘o i le fia fai taui ma ana perofeta ‘ua latou ‘i‘ite i le fia fai tupe; a ‘ua latou fa‘alagolago i le ALI‘I ma fa‘apea ane, “E lē o ‘iā te i tatou ‘ea le ALI‘I e lē o‘o mai se mea leaga ‘iā te i tatou.”
12. O le mea lea e fai ai Siona ma fanua e suatia ‘ona o ‘outou, e fai fo‘i Ierusalema ma faupu‘egama‘a, o le mauga fo‘i o i ai le fale e fai lea ma mea maualuga i le vao matua.#