1. Auē a‘u nei! auā ‘ua ‘avea a‘u pei o le fuata ‘ua uma ‘ona fa‘aputuina, pei o toe fuifui vine i le taugāvine e leai se fuifui vine e ‘ai ai; na ‘ou mana‘o i le mati e mua‘i matua.
2. ‘Ua fano lē ‘ua agalelei nai le nu‘u; e leai se tasi tagata ‘ua amiotonu latou te lamalama uma ‘ina ‘ia fasioti tagata; ‘ua latou ta‘itasi ma tuli lona uso ma le ‘upega.
3. ‘Ua matua faia mea leaga i o latou lima; e ‘ua fai atu le ali‘i sili ‘atoa ma le fa‘amasino i se taui; ‘ua tautala atu fo‘i le matai tagata i lona manumanu; o lea ‘ua latou fa‘api‘opi‘o ai.
4. O so latou e lelei e tusa ia ma le la‘au tuitui; o sē amiotonu e sili ‘ona matuitui o ia i le ‘ai la‘au tuitui; o lo‘o o‘o mai le aso o ou tagata va‘ai, o lou asiasiga lava; e i ai nei lava lo latou femēmēa‘i.
5. ‘Aua ne‘i ‘outou fa‘atuatua i le uō, ‘aua ne‘i fa‘alagolago i le aumeamamae; ‘ia e leoleo i puipui o lou gutu i lau avā pele.
6. Auā o lo‘o ‘ino‘ino le atali‘i i le tamā, o le tama teine ‘ua tu o ia e tete‘e i lona tinā, o le avā a le tama tane e tete‘e atu o ia i le tinā o lana tane o ē ‘ua ita i le tagata, o tagata ia o lona lava ‘āiga.
7. A o a‘u, ‘ou te fa‘atalitali i le ALI‘I, ‘ou te fa‘amoemoe i le Atua o lo‘u olataga; e fa‘afofoga mai lo‘u Atua ‘iā te a‘u.
8. ‘Aua ‘e te mitamita ‘iā te a‘u, o oe na, lē na ita mai ‘iā te a‘u; e ui lava ‘ina ‘ou pa‘ū, ‘ou te toetū lava i luga; e ui lava ‘ina ‘ou nofo i le pouliuli, a o le ALI‘I o lo‘u malamalama ia.
9. ‘Ou te fa‘ato‘ato‘a i le to‘atama‘i o le ALI‘I, auā ‘ua ‘ou agasala atu ‘iā te ia; se‘ia faia e ia la‘u finauga ma na faia fo‘i lo‘u fa‘amasinoga; na te fa‘ao‘oina a‘u i le malamalama, ‘ou te iloa lana amiotonu.
10. E iloa ai fo‘i e lē ‘ua ita mai ‘iā te a‘u, e liloia fo‘i o ia i le mā, o lē na fai mai ‘iā te a‘u, “O ifea ‘ea le ALI‘I lou Atua?” E iloa o ia e o‘u mata, e solia nei o ia e pei o le palapala i le ala.
11. O le aso e atiina a‘e ai ou pā, o le aso lea e ‘avea mamao ai le tulafono.
12. O lea aso, latou te ō mai ai lava ‘iā te oe nai Asuria, ‘atoa ma ‘a‘ai o Aikupito mai Aikupito lava e o‘o i le vaitafe mai le tasi sami e o‘o i le tasi sami, mai le tasi mauga e o‘o i le tasi mauga.
13. ‘Ae fa‘atafunaina le nu‘u ‘ona o ē mau ai, ‘ona o le fua o a latou amio.
14. ‘Ia e leoleo i lou nu‘u ma lou to‘oto‘o, o le lafu mamoe o lou tofi o ē nofo ‘ese i le vao, i Karamelu; ‘ia latou ‘a‘ai i Vasana ma Kiliata, pei o ona po lava.
15. Fa‘apei o ona po sa e sau ai i le nu‘u o Aikupito, ‘ou te fa‘aali atu i ai vāvega.
16. E iloa e nu‘u ‘ese, ‘ona māsiasi ai lea o i latou i lo latou malosi uma; latou te ufiufi ai o latou gutu i o latou lima, e tutuli fo‘i o latou taliga.
17. Latou te etoeto i le efuefu pei o le gata e pei o mea fetolofi i le lau‘ele‘ele latou te tetemū ai i mea ‘ua puipuia mo i latou; latou te matata‘u i le ALI‘I lo tatou Atua latou te fefefe fo‘i ‘iā te oe.
18. O ai ‘ea se Atua e tusa ma oe o le fa‘amāgalo agasala, ‘ina ‘ua lē manatua solitulafono a ē o totoe o lona tofi. Na te lē fa‘amoemoe pea i lona to‘asā, auā e fiafia o ia i le alofa.
19. E toe alofa mai ia ‘iā te i tatou, e fa‘ato‘ilaloina ia a tatou amioletonu ‘e te lafo fo‘i a latou agasala uma i mea loloto o le sami.
20. ‘E te fa‘ao‘o le fa‘amaoni ‘iā Iakopo, o le alofa ‘iā Aperaamo, sa e tautō ai i o matou tamā tala mai ona po anamua.#