1. ‘Ua o‘o mai fo‘i le afioga a le ALI‘I o ‘au, o lo‘o fa‘apea mai:
2. O lo‘o fa‘apea ‘ona fetalai mai o le ALI‘I o ‘au, Na ‘ou mā‘elegā ‘iā Siona ma le mā‘elegā tele; na ‘ou mā‘elegā fo‘i ‘iā te ia ma le ita tele.
3. O lo‘o fa‘apea ‘ona fetalai mai o le ALI‘I, ‘Ua ‘ou fo‘i atu i Siona, ‘ou te mau fo‘i i totonu o Ierusalema; e igoa Ierusalema, O le ‘a‘ai e fa‘amaoni; o le mauga fo‘i o le ALI‘I o ‘au, e igoa lea, o le mauga pa‘ia.
4. O lo‘o fa‘apea ‘ona fetalai mai o le ALI‘I o ‘au, E toe nonofo toeaina ma lo‘omatutua i malae o Ierusalema; o le tagata fo‘i ma lona to‘oto‘o i lona lima ‘ona o le tele o latou tausaga.
5. E tūtūmu fo‘i malae o le ‘a‘ai i tamaiti ma teineiti o lo‘o ta‘a‘alo i ona malae.
6. O lo‘o fa‘apea ‘ona fetalai mai o le ALI‘I o ‘au, E ui lava ‘ina faigatā i le manatu o ē ‘ua totoe o lenei nu‘u i ia ona aso, pe faigatā ‘ea fo‘i i lo‘u manatu ‘ua fetalai mai ai le ALI‘I o ‘au.
7. O lo‘o fa‘apea ‘ona fetalai mai o le ALI‘I o ‘au Fa‘auta, ‘Ou te fa‘aola i lo‘u nu‘u nai le nu‘u e alu a‘e ai le la ma le nu‘u e alu ifo ai.
8. ‘Ou te ‘aumai na i latou, latou te nonofo ai i totonu o Ierusalema e fai fo‘i i latou mo‘u nu‘u, e fai fo‘i a‘u mo latou Atua i le fa‘amaoni ma le amiotonu.
9. O lo‘o fa‘apea ‘ona fetalai mai o le ALI‘I o ‘au: ‘Ia malolosi o ‘outou lima o ē fa‘alogologo mai i nei ona po i ‘upu nei i fofoga o perofeta, ē na i ai i ona aso na fa‘avaeina ai le fale o le ALI‘I o ‘au, o le malumalu, ‘ina ‘ia faia;
10. auā a o le‘i o‘o i ia ona aso sa leai se taui o le tagata, po o se taui o le manu; e leai fo‘i se filemū i lē na fealua‘i, ‘ona o lē na ita mai; na ‘ou fa‘aoso fo‘i i tagata uma ‘ia fete‘ena‘i i latou.
11. A o nei ona po, ‘ou te lē pei o aso anamua i ē ‘ua totoe i le nu‘u nei, ‘ua fetalai mai ai le ALI‘I o ‘au.
12. Auā e i ai le fua o le to‘alemū; e fua mai e le vine i ona lava fua, o fua mai fo‘i le lau‘ele‘ele i ona lava fua, o le lagi fo‘i e totō ifo ai lona sau; ‘ou te avatua fo‘i ia mea uma i ē ‘ua totoe o lenei nu‘u e fai mā latou.
13. E pei ‘ona fai ‘outou ma fetu‘u i nu‘u ‘ese, o oe le ‘āiga o Iuta, ma oe le ‘āiga o Isaraelu, e fa‘apea ‘ona ‘ou fa‘aola ‘iā te ‘outou, e fai ai ‘outou ma fa‘amanuia; ‘aua le fefefe; ‘ia malolosi o ‘outou lima.
14. Auā o lo‘o fa‘apea ‘ona fetalai mai o le ALI‘I o ‘au: E pei ‘ona ‘ou manatu e fa‘atigā ‘iā te ‘outou, ‘ina ‘ua fa‘a‘ono‘ono mai o ‘outou tamā ‘iā te a‘u, ‘ua fetalai mai ai le ALI‘I o ‘au, ma ‘ou le‘i salamō ai;
15. e fa‘apea ‘ona ‘ou toe manatu i nei ona aso e agalelei atu ‘iā Ierusalema ma le ‘āiga o Iuta; ‘aua tou te matata‘u.
16. O mea nei tou te faia, ‘Ia ‘outou tautala i ‘upu moni o le tasi i le tasi ma ‘ia fa‘amasino i le fa‘amaoni ma le fa‘amasinoga e lelei ai i o ‘outou faitoto‘a.
17. ‘Aua le mānatunatu i o ‘outou loto i se mea leaga e fai e le tasi i le tasi; ‘aua fo‘i le fiafia i le tautō pepelo; auā o mea uma ia ‘ou te ‘ino‘ino i ai, ‘ua fetalai mai ai le ALI‘I.
18. ‘Ua o‘o mai fo‘i le afioga a le ALI‘I o ‘au ‘iā te a‘u, o lo‘o fa‘apea mai:
19. O lo‘o fa‘apea ‘ona fetalai mai o le ALI‘I o ‘au, o le anapogi i le masina e fa ma le anapogi i le masina e lima ma le anapogi i le masina e fitu ma le anapogi i le masina e sefulu e fai ma fiafia ia ma ‘oli‘oli ma aso o tausamiga lelei i le ‘āiga o Iuta; a ‘ia ‘outou fiafia i le ‘upu moni ma le manuia.
20. O lo‘o fa‘apea ‘ona fetalai mai o le ALI‘I o ‘au: E toe ō mai nu‘u ma tagata o ‘a‘ai e tele;
21. e ō atu tagata o le tasi ‘a‘ai i le tasi ‘a‘ai, o lo‘o fa‘apea, “Ō mai ia, ‘inā tatou ō e fa‘alaulelei i le finagalo o le ALI‘I ma sā‘ili ia i le ALI‘I o ‘au; ‘ou te alu fo‘i a‘u.”
22. E ō mai fo‘i nu‘u e tele ma nu‘u malolosi e sā‘ili i le ALI‘I o ‘au i Ierusalema, e fa‘alaulelei fo‘i i le finagalo o le ALI‘I.
23. O lo‘o fa‘apea ‘ona fetalai mai o le ALI‘I o ‘au: O ia ona aso e tago atu ai tagata e to‘atinoagafulu a‘i gagana uma o nu‘u ‘ese; latou te tago atu lava i le pito ‘ofu o le sa Iuta ma fa‘apea atu, “Tatou te ō ma ‘outou auā ‘ua matou fa‘alogo, o lo‘o ‘iā te ‘outou le Atua.”#