1. ‘Ua ia fa‘aali mai fo‘i ‘iā te a‘u o Iosua le ositaulaga sili, o lo‘o tu i luma o le agelu a le ALI‘I; o Satani fo‘i, o lo‘o tu o ia i lona itū taumatau e tete‘e atu ‘iā te ia.
2. ‘Ona fetalai atu lea o le ALI‘I ‘iā Satani, “‘Ia a‘oa‘i atu le ALI‘I ‘iā te oe Satani, ‘ia a‘oa‘i atu ‘iā te oe le ALI‘I, o lē ‘ua filifili i Ierusalema; e lē o le motumotu ‘ea lenei na se‘ia mai le afi?”
3. ‘Ua ‘ofu Iosua i ‘ofu ‘ele‘elea; ‘ua tu fo‘i o ia i luma o le agelu.
4. ‘Ua ia tali atu ma fetalai atu i ē na tutū mai i ona luma, o lo‘o fa‘apea, “‘Ave ‘ese ia o ‘ofu ‘ele‘elea ‘ua ‘ofu ai o ia.” ‘Ua ia fetalai atu fo‘i ‘iā te ia, “Fa‘auta, ‘ua ‘ou ‘ave‘esea au amioletonu i ou luga; ‘ou te fa‘a‘ofu fo‘i ‘iā te oe i le ‘ofu matagofie.”
5. ‘Ona ‘ou fai atu lea, “‘Ia latou fa‘ae‘e le pulou lelei i luga o lona ulu.” ‘Ona latou fa‘ae‘e ai lea o le pulou lelei i lona ulu ma fa‘a‘ofu ‘iā te ia i ‘ofu; o lo‘o tu mai fo‘i le agelu a le ALI‘I.
6. ‘Ua matuā fai atu le agelu a le ALI‘I ‘iā Iosua, o lo‘o fa‘apea,
7. “O lo‘o fa‘apea ‘ona fetalai mai o le ALI‘I o ‘au, ‘Āfai ‘e te savali i o‘u ala, ‘āfai fo‘i ‘e te tausiusi i a‘u sauniga, ‘ona e fa‘amasino ai lea i lo‘u fale ma e leoleo i o‘u lotoā; ‘ou te tu‘u atu fo‘i ‘iā te oe e ta‘ita‘i mai ‘iā te i latou nei o ē tutū mai.
8. ‘Ia e fa‘alogo mai Iosua e, le ositaulaga sili, o oe ‘atoa ma ē ‘ua ‘iā te oe, o ē nonofo i ou luma; auā e fai ma fa‘ailoga nei tagata; fa‘auta fo‘i, ‘ou te ‘aumaia i la‘u ‘au‘auna o le LA LA‘AU.
9. Auā fa‘auta, o le ma‘a na ‘ou tu‘uina atu i luma o Iosua, e i le ma‘a e tasi mata e fitu; fa‘auta ‘ou te togitogi i ai ona togitogiga, ‘ua fetalai mai ai le ALI‘I o ‘au; ma ‘ou ‘ave ‘ese le amioletonu a le nu‘u nei i le aso e tasi.
10. ‘Ua fetalai mai le ALI‘I o ‘au, o lea aso tou te ta‘itasi ai ma vala‘au i lana uō i lalo o le vine ma lalo o le mati.”#