26. Og Jesus sende han heim. «Men gå ikkje inn i landsbyen {{og sei det ikkje til nokon der}}!» sa han.
27. Sidan fór Jesus og læresveinane hans bort til landsbyane ved Cæsarea Filippi. På vegen spurde han læresveinane: «Kven seier folk at eg er?»
28. Dei svara: «Somme seier døyparen Johannes, andre Elia og atter andre ein av profetane.»
29. «Og de», spurde han, «kven seier de at eg er?» Då svara Peter: «Du er Messias.»
30. Men han forbaud dei strengt å snakka om han til nokon.
31. Då tok Jesus til å læra dei: «Menneskesonen må lida mykje og bli vraka av dei eldste, overprestane og dei skriftlærde. Han skal bli slegen i hel, og tre dagar etter skal han stå opp att.»
32. Dette tala han ope om. Då tok Peter han til sides og gav seg til å tala han til rette.
33. Men Jesus snudde seg, såg på læresveinane og sa strengt til Peter: «Vik bak meg, Satan! Du har ikkje tanke for det som Gud vil, berre for det som menneske vil.»
34. Sidan kalla han til seg folket og læresveinane sine og sa til dei: «Vil nokon følgja etter meg, må han seia nei til seg sjølv og ta krossen sin opp og følgja meg.
35. For den som vil berga livet sitt, skal mista det. Men den som mistar livet sitt for mi skuld og for evangeliet, skal berga det.
36. Kva gagnar det eit menneske om det vinn heile verda, men taper si sjel?
37. Og kva kan eit menneske gje til vederlag for si sjel?
38. For den som skjemmest ved meg og orda mine i denne utrue og syndige slekta, skal òg Menneskesonen skjemmast ved når han kjem i sin Fars herlegdom saman med dei heilage englane.»