29. Па затоа и вие, не барајте што ќе јадете или што ќе пиете; и не се загрижувајте!
30. Сето тоа го бараат незнабошците на овој свет; а вашиот Отец знае дека тоа ви е потребно.
31. Но барајте го царството Божјо, и сето тоа ќе ви биде придодадено!
32. Не плаши се, мало стадо! Зашто волјата на вашиот Отец е вам да ви го даде царството.
33. Продајте си ги имотите ваши и давајте милостина! Подгответе си ќесиња што нема да изветват, неисцрпна ризница на небото, каде крадец не се приближува и кое молец не го јаде;
34. зашто, каде што е вашата ризница, таму ќе биде и срцето ваше.
35. Нека ви биде половината препашана и светилата – запалени!
36. Тогаш и вие ќе личите на оние луѓе, што го чекаат својот господар да се врати од свадба, за да му отворат веднаш штом ќе дојде и почука.
37. Блазе на оние слуги што ќе ги затече господарот будни, кога ќе си дојде! Вистина ви велам, тој ќе се препаша и ќе им рече да седнат, па ќе пристапи и ќе им служи.
38. А ако дојде и на втора или на трета ноќна стража, и ги затекне така, блазе на тие слуги!
39. Знајте го и тоа дека, ако домаќинот на куќата би знаел во кој час ќе дојде крадецот, тој би седел буден и не би дозволил да му ја поткопаат куќата.
40. Затоа и вие, бидете подготвени, зашто Синот Човечки ќе дојде во часот кога не се надевате!“
41. А Петар Му рече: „Господи, за нас ли ја кажуваш оваа парабола, или за сите?“
42. Тогаш Господ рече: „Кој е тој верен и разборит настојник, кого го поставил неговиот господар над своите слуги, за да им ја дава потребната храна навреме?
43. Блазе на тој слуга, чиј господар, кога ќе дојде, ќе го затекне така да постапува!
44. Вистина ви велам дека тој ќе го постави него над целиот свој имот.
45. Ако, пак, тој слуга си рече во срцето свое: ‚Нема скоро да дојде мојот господар!‘, па почне да ги тепа слугите и слугинките, да јаде и пие и да се опива,
46. господарот на тој слуга ќе дојде во ден во кој не очекува, и во час што не го знае, па ќе го расече на две и ќе му даде удел со неверните.