3. Ergyd drom ac annioddefol gan bawb oedd y drwg pellach hwn.
4. Oherwydd fe lanwyd y deml ag anlladrwydd a rhialtwch cenedl-ddynion yn eu difyrru eu hunain gyda phuteiniaid ac yn cydorwedd â gwragedd oddi mewn i'r cylch sanctaidd, ac at hynny'n dwyn pethau gwaharddedig i mewn iddo.
5. Pentyrrwyd ar yr allor bethau amhur a gwaharddedig gan y cyfreithiau.
6. Ni chaniateid i neb na chadw'r Saboth na pharchu'r gwyliau traddodiadol na chymaint â chyfaddef ei fod yn Iddew.
7. Pob mis, ar ddydd dathlu geni'r brenin, yr oeddent dan orfod llym i fynd a bwyta cig yr aberth, ac ar ŵyl Dionysus fe'u gorfodid i orymdeithio ag eiddew ar eu pennau er anrhydedd i Dionysus.
8. Fe ddeddfwyd yn y dinasoedd Helenistaidd cyfagos, ar awgrym Ptolemeus, fod yr un drefn i'w gosod ar Iddewon y dinasoedd hynny: sef eu bod i fwyta cig yr aberth,
9. a bod y rhai a wrthodai newid i'r ffyrdd Helenistaidd i'w dienyddio. Yr oedd y trallod a ddaethai ar eu gwarthaf yn amlwg i bawb.
10. Er enghraifft, dygwyd gerbron llys barn ddwy wraig oedd wedi enwaedu ar eu plant. Crogwyd eu babanod wrth eu bronnau a mynd â hwy yn sioe o amgylch y ddinas, ac yna eu lluchio i farwolaeth oddi ar y mur.
11. Ac yr oedd eraill wedi ymgynnull yn ddirgel yn yr ogofâu gerllaw i gadw'r seithfed dydd. Fe'u bradychwyd i Philip, ac fe'u llosgwyd yn fyw i gyd gyda'i gilydd am iddynt wrthod ar egwyddor eu hamddiffyn eu hunain, o barch tuag at y dydd mwyaf cysegredig.
12. Gan hynny, yr wyf yn annog darllenwyr y llyfr hwn i beidio â digalonni o achos y trychinebau, ond i'w cyfrif fel cosbau a fwriadwyd nid i ddifa'n cenedl ond i'w disgyblu;
13. ac yn wir, arwydd o garedigrwydd mawr yw'r ffaith nad yw'r annuwiolion yn cael rhwydd hynt am amser hir, ond bod eu haeddiant yn dod arnynt yn ddi-oed.
14. Oherwydd yn achos y cenhedloedd eraill y mae'r Arglwydd yn disgwyl yn amyneddgar nes i'w pechodau gyrraedd eu penllanw, ac wedyn y mae'n eu cosbi; ond nid felly y barnodd yn ein hachos ni,
15. rhag iddo ddial arnom ar ôl i'n pechodau gyrraedd eu hanterth.
16. Gan hynny, nid yw byth yn troi ei drugaredd oddi wrthym, ac wrth ddisgyblu ei bobl trwy drallod nid yw'n cefnu arnynt. Ond dylai hyn o eiriau gennyf fod yn ddigon i'ch atgoffa o hynny;
17. wedi'r ychydig grwydro hwn rhaid ailgydio yn yr hanes.
18. Yr oedd Eleasar yn un o'r ysgrifenyddion blaenllaw, yn ddyn oedd eisoes wedi cyrraedd oedran mawr, ac yn hardd iawn o ran pryd a gwedd. A dyma lle'r oedd yn cael ei orfodi i agor ei geg led ei ben ac i fwyta cig moch.
19. Ond dewisach ganddo ef oedd marw'n anrhydeddus na byw'n halogedig, a dechreuodd o'i wirfodd gerdded tuag at yr ystanc
20. gan boeri'r cig allan, fel y dylai pawb wneud sy'n ddigon dewr i ymwrthod â phethau nad yw'n gyfreithlon eu bwyta, pa faint bynnag y mae dyn yn caru byw.