1. Anak, hinumdomi ang akong gisulti ug ayaw kalimti ang gipabuhat ko kanimo.
2. Buhata ang gisugo ko kanimo ug motaas ang imong kinabuhi. Tumana kanunay ang akong pagtulon-an ingon nga kini mao ang labing bililhon diha sa imong kinabuhi.
3. Ihigot kini sa imong mga tudlo ug isulat kini sa imong kasingkasing.
4. Isipa ang kaalam nga daw imong igsoon ug ang maayong panabot nga daw labing suod mong higala.
5. Ilikay ka niini gikan sa daotang babaye ug sa madanihon niyang mga pulong.
6. Usa ka adlaw niana namintana ako sa akong balay
7. ug nakita ko ang daghang mga batan-ong lalaki nga wala pay kasinatian sa kinabuhi apan nakamatikod ako ug usa ka batan-ong buangbuang.
8. Naglakaw siya sa dalan duol sa eskina diin nagpuyo ang usa ka babaye, ug miadto siya sa balay niini
9. pagsalop sa adlaw, sa pagkagabii.
10. Unya gitagbo siya sa babaye; nagbisti siya ingon sa usa ka babayeng nagbaligya sa iyang dungog ug matintalon kaayo.
11. Mahagithagiton siya ug walay ulaw; babaye nga dili makapuyo ug balay.
12. Nagpaabot siya sa eskina; usahay diha gayod sa dalan ug usahay usab diha sa merkado.
13. Gigakos niya ang batan-ong lalaki ug gihagkan, gitutokan niya ang iyang mata ug giingnan,
14. “Naghalad ako karong adlawa ug nabayran na nako ang akong mga saad.
15. Busa gipangita ko ikaw. Gimingaw ako kanimo ug ania ka na gayod!
16. Gihapinan ko ang akong higdaanan ug dekolor nga lino gikan gayod sa Ehipto.
17. Gipahumotan ko kinig mira, aloe ug sinamon.
18. Dali ug maglipay kita sa tibuok gabii. Tagbawon nato ang atong kaugalingon.
19. Wala sa balay ang akong bana. Nagbiyahe siya sa layo.
20. Nagdala siyag daghang salapi ug dili tingali mahiuli niining duha ka semana.”
21. Busa natintal niya ang lalaki pinaagi sa iyang kamabihagon ug sa mga pulong nga matahom.
22. Dihadiha mikuyog kaniya ang lalaki sama sa usa ka torong baka nga nagpadulong sa ihawan, sama sa lagsaw nga nagpadulong sa lit-ag,
23. diin usa ka udyong motaroy sa iyang kasingkasing. Sama siya sa usa ka langgam nga nagpaingon sa lit-ag—wala siya masayod nga namiligro ang iyang kinabuhi.
24. Busa karon, mga anak, paminawa ako. Patalinghogi ang akong isulti.
25. Likayi ninyo kining matanga sa babaye; ayaw padani kaniya.
26. Nakadaot siyag daghang mga lalaki ug maoy nakaingon sa kamatayon sa dili maihap nga mga lalaki.
27. Ang iyang balay mao ang dalan padulong sa kalibotan sa mga patay. Dali ra ang kamatayon kon moadto ka kaniya.