1. Sa pagkamatikod sa mga tawo nga si Moises dugay nga wala molugsong gikan sa bukid, miadto sila kang Aaron ug miingon kaniya, “Hala, buhati kamig usa ka dios nga maoy mangulo kanato kay wala kita masayod unsay nahitabo niining tawo nga ginganlag Moises nga maoy nangulo kanato sa paggawas sa Ehipto.”
2. Si Aaron miingon kanila, “Panguhaa ang mga ariyos nga bulawan sa inyong mga asawa ug sa inyong mga anak nga lalaki ug babaye ug dad-a nganhi kanako.”
3. Busa gikuha sa tanang katawhan ang ilang mga ariyos nga bulawan ug gidala ngadto kang Aaron.
4. Gidawat niya ang mga ariyos ug gitunaw kini ug gibubo ang bulawan ngadto sa hulmahan. Pinaagi niini nahulma ang usa ka nating baka.Ang mga tawo miingon, “Israel, mao kini ang atong dios nga nagkuha kanato sa Ehipto.”
5. Sa pagkakita ni Aaron niini, nagtukod siyag usa ka halaran sa atubangan sa nating baka nga bulawan. Unya nagpahibalo siya sa pag-ingon, “Ugma adunay kasaulogan aron sa pagpasidungog sa Ginoo.”
6. Sayo sa pagkasunod buntag naghalad silag mga mananap nga gisunog ug naghalad silag mga mananap alang sa halad sa pakigdait. Nanglingkod ang katawhan, nag-inom ug nangaon ug unya nagpatuyang sila sa kahilayan.
7. Miingon ang Ginoo kang Moises, “Lakaw, pagdalig lugsong kay ang imong katawhan nga gipagawas mo sa Ehipto nagpakasala.
8. Dali ra silang mitipas sa dalan nga gipasubay ko kanila. Naghimo sila ug usa ka nating baka sa tinunaw nga bulawan ug gisimba nila kini ug naghalad usab silag mga sakripisyo alang niini. Miingon sila, ‘Israel, mao kini ang atong dios nga nagkuha kanato sa Ehipto.’”
9. Ang Ginoo miingon kang Moises, “Nasayod ako nga gahig ulo kining maong katawhan.
10. Karon, pasagdi ako kay laglagon ko sila sa nagdilaab kong kasuko. Unya himoon ko ikaw ug ang imong kaliwatan nga usa ka bantogang nasod.”
11. Apan si Moises nangaliyupo sa Ginoo nga iyang Dios ug miingon, “O Ginoo, nganong pasilaobon mo man ang imong kasuko batok sa imong katawhan nga giluwas mo gikan sa Ehipto pinaagi sa dako mong gahom?
12. Makaingon unya ang mga Ehiptohanon nga gikuha mo diay sila sa Ehipto kay buot mo silang patyon didto sa kabukiran ug aron mapuo sila. Ayaw na intawon ipadayon ang imong kasuko. Ayaw usab intawon pahamtangi sa katalagman ang imong katawhan.
13. Hinumdomi ang imong mga alagad nga si Abraham, si Isaac ug si Jacob ug ang gisaad mo kanila nga gipanumpaan mo sa imong ngalan. Miingon ka kanila, ‘Pasanayon ko ang inyong kaliwatan sama kadaghan sa mga bituon. Ihatag ko sa inyong mga kaliwat kining tanang yuta nga akong gisaad ug mapanag-iya nila kini hangtod sa kahangtoran.’”
14. Busa wala ipadayon sa Ginoo ang iyang nahunahunaang buhaton ug wala niya pahamtangi sa katalagman ang iyang katawhan.
15. Mibiya si Moises ug milugsong sa bukid dala ang tigpahinumdom nga duha ka papan nga may sulat sa kasugoan sa luyog luyo.
16. Ang naghimo niadtong papan mao ang Dios ug ang nahisulat niini gikulit sa Dios mismo.
17. Nadungog ni Josue ang kaguliyang sa mga tawo ug miingon siya kang Moises, “Nadungog ko ang kagahob nga sama sa gubat sulod sa kampo.”
18. Si Moises miingon, “Dili kana kagahob sa kadaogan o kagahob sa kasub-anan tungod sa kapildihan kondili mga panag-awit ang akong nabati.”
19. Sa dihang nagkaduol na si Moises sa kampo ug nakita niya ang nating baka ug ang mga tawo nga nagsayaw, labihan niyang sukoa. Gibusdak niya ang mga papan nga iyang gidala ug napusgay kini diha sa tiilan sa bukid.
20. Unya gikuha niya ang nating baka nga ilang gihimo ug gidaoban kini. Unya iyang gidugmok ug gisagol sa tubig ug gipainom niya kini sa katawhan sa Israel.
21. Giingnan niya si Aaron, “Unsay gihimo niining katawhan nganha kanimo nga giangin mo man sila sa paghimo niining makalilisang nga sala?”
22. Si Aaron mitubag, “Ayaw kasuko kanako. Nasayod ka bitaw nga gusto gayod sila nga magbuhat ug daotan.
23. Miingon sila kanako, ‘Himoi kamig dios aron maoy mangulo kanamo kay wala kami masayod unsay nahitabo kang Moises nga maoy nagkuha kanamo sa Ehipto.’
24. Giingnan ko sila, ‘Dad-a ngari kanako ang inyong bulawan.’ Busa gihatag nila kanako ang ilang bulawan. Unya giitsa ko kini sa kalayo ug nahulma kining nating baka.”
25. Nakita ni Moises nga wala makapugong si Aaron sa katawhan ug nagpatuyang sila sa ilang kaugalingon atubangan sa ilang kaaway.
26. Busa mitindog si Moises diha sa ganghaan sa kampo ug misinggit, “Kadtong dapig sa Ginoo duol kanako!” Miduol kaniya ang tanang mga Levita
27. ug giingnan niya sila, “Kini mao ang giingon sa Ginoo, ang Dios sa Israel, ‘Ang matag usa kaninyo kinahanglan magtakin sa iyang espada ug lukpa ninyog suroy ang tibuok kampo ug pamatya ninyo ang inyong igsoong lalaki, kahigalaan ug mga silingan.’”
28. Gituman sa mga Levita ang gisugo ni Moises kanila ug niadtong adlawa 3,000 ka tawo ang napatay.
29. Giingnan ni Moises ang mga Levita, “Niining adlawa gihalad ninyo ang inyong kaugalingon ingon nga mga pari alang sa pag-alagad sa Ginoo pinaagi sa pagpatay sa inyong mga anak nga lalaki ug mga igsoong lalaki busa gipanalanginan kamo sa Ginoo karong adlawa.”
30. Pagkasunod adlaw si Moises miingon sa katawhan, “Nakahimo kamog makalilisang nga sala. Apan karon, motungas ako sa bukid ngadto sa Ginoo, basin pag madani ko siya sa pagpasaylo sa inyong sala.”
31. Mibalik si Moises ngadto sa Ginoo ug miingon, “Pagkamakalilisang gayod sa sala nga nahimo niining mga tawhana! Naghimo sila ug diosdios nga bulawan aron ilang simbahon.
32. Apan pasayloa intawon sila sa ilang mga sala. Kon dili ka makapasaylo kanila, papasa sa imong listahan ang akong ngalan.”
33. Ang Ginoo miingon kang Moises, “Ang ngalan sa nakasala kanako maoy akong papason.
34. Karon, lakaw, dad-a ang mga tawo sa dapit nga giingon ko kanimo. Ayaw kalimot nga giyahan kamo sa akong anghel. Hinumdomi nga ang akong anghel magagiya kanimo apan inig-abot sa hustong panahon silotan ko gayod sila tungod sa ilang sala.”
35. Gipadad-an sa Ginoo ug mga sakit ang katawhan tungod kay ilang gipahimo si Aaron ug nating baka nga bulawan.