1. Ang Ginoo miingon kang Moises ug kang Aaron didto sa Ehipto,
2. “Kining bulana mao ang unang bulan sa tuig alang kaninyo.
3. Ipahibalo sa tibuok pundok sa Israel nga sa ikanapulong adlaw niining bulana, kinahanglan nga ang matag pangulo sa panimalay magpili ug nating karnero o nating kanding alang sa iyang pamilya; usa ka mananap matag panimalay.
4. Kon gamay ra kaayo ang pamilya ug dili makahurot pagkaon sa usa ka mananap tabangan kini pagkaon sa duha ka panimalay nga managsilingan sumala sa gidaghanon sa namuyo sa matag panimalay. Bahinbahina ang mananap sumala sa makaon sa matag tawo.
5. Makapili kamog karnero o kanding apan kinahanglan nga wala kini tatsa, laki kini ug usa ka tuig ang kagulangon.
6. Andama kini hangtod sa ika-14 ka adlaw sa bulan nga maoy panahon nga ang tibuok Israel mag-ihawg mga mananap pagkagabii.
7. Unya magkuha silag dugo ug ipahid diha sa duha ka haligi sa pultahan ug sa ibabaw sa pultahan sa mga balay diin kan-on ang mga mananap.
8. Niadtong gabhiona aslon ang mananap ug kan-on uban sa pan nga walay patubo ug sa mga utanon nga pait.
9. Ayaw pagkaon sa bisan unsa niini nga hilaw o sinabaw. Asla gayod ang tibuok mananap uban sa ulo, sa tiil ug sa mga sulod sa ginhawaan niini.
10. Kan-a ninyo kini ug ayaw pabuntagi bisag diyutay niini. Kon may masalin, sunoga kini.
11. Inigkaon ninyo niini kinahanglan nga magbakos kamo, magsul-ob sa inyong sandalyas ug magkupot sa inyong sungkod ug dalia ninyo pagkaon. Mao kini ang kasaulogan sa Pagsaylo sa Ginoo.
12. “Nianang gabhiona suroyon ko ang Ehipto ug pamatyon ang tanang panganayng anak sa tawo ug sa mananap. Silotan ko ang tanang diosdios sa Ehipto. Ako ang Ginoo.
13. Ang dugo maoy ilhanan sa mga balay nga inyong gipuy-an. Inigkakita ko sa dugo sayloan ko kamo ug walay kadaot nga moabot kaninyo inigkastigo ko sa Ehipto.
14. Kining adlawa mahimong halandumon alang kaninyo. Sauloga ninyo kini ug sa tanan ninyong kaliwatan aron pagpasidungog sa Ginoo. Himoon kini ingon nga tulomanon sa tanang panahon.
15. “Sulod sa pito ka adlaw pan nga walay patubo ang inyong kan-on. Sa unang adlaw kuhaa ninyo ang tanang patubo sa pan nga anaa sa inyong mga balay kay kon may mokaon ug pan nga may patubo sa bisan unsang adlawa gikan sa una hangtod sa ikapitong adlaw, dili na siya isipon nga sakop sa akong katawhan.
16. Sa una ug sa ikapitong adlaw, pagtigom kamo aron pagsimba kanako. Dili kamo magtrabaho nianang mga adlawa apan makahimo kamo paghikay ug pagkaon alang sa tanan.
17. Himoa ninyo kining Kasaulogan sa Pan nga Walay Patubo kay niining adlawa gipagawas ko kamo sa Ehipto. Sauloga ninyo ug sa tanan ninyong kaliwatan kining adlawa ingon nga tulomanon sa tanang panahon.
18. Gikan sa gabii sa ika-14 ka adlaw sa unang bulan hangtod sa gabii sa ika-21 ka adlaw, kinahanglan pan nga walay patubo ang inyong kan-on.
19. Kinahanglan nga walay patubo diha sa inyong mga balay sulod sa pito ka adlaw kay kon may mokaon sa pan nga may patubo, lumad man siya o langyaw, hinginlan siya gikan sa katawhan sa Israel.
20. Ayaw gayod kamo pagkaon sa pan nga may patubo.”
21. Gipatawag ni Moises ang tanang kadagkoan sa Israel ug giingnan niya, “Pangita kamog nating karnero o kanding alang sa inyong mga panimalay ug ihawa kini aron pagsaulog sa Pagsaylo.
22. Pagkuhag sanga sa isopo ug ituslob kini sa dugo nga anaa sa planggana ug paghiri ang duha ka haligi sa pultahan ug ang babag ibabaw sa pultahan. Ayaw kamo panggawas sa inyong balay hangtod sa buntag
23. kay mosuroy ang Ginoo aron pagpatay sa mga Ehiptohanon ug inigkakita niya sa dugo diha sa babag ug sa mga haligi sa pultahan, mosaylo lamang siya ug dili niya pasudlon ang Tiglaglag nga Anghel aron sa pagpatay kaninyo.
24. Tumana ninyo kini ingon nga permanenteng sugo alang kaninyo ug sa inyong mga anak.
25. Kinahanglan himoon ninyo kining maong seremonyas inigsulod ninyo sa yuta nga ihatag sa Ginoo kaninyo sumala sa iyang gisaad.
26. Kon mangutana ang inyong mga anak sa kahulogan niining maong seremonyas,
27. ingna sila nga mao kini ang halad-pahinungod sa Pagsaylo sa Ginoo kay gisayloan man niya ang mga balay sa mga Israelita didto sa Ehipto ug ang mga Ehiptohanon ra ang gipamatay niya.”Nangluhod ang mga Israelita ug misimba sila sa Ginoo.
28. Unya nanglakaw sila ug gituman nila ang gisugo sa Ginoo kang Moises ug kang Aaron.
29. Sa pagkatungang gabii, gipamatay sa Ginoo ang tanang kamagulangang anak nga lalaki didto sa Ehipto gikan sa anak sa hari nga maoy manununod sa trono, ngadto sa anak sa mga binilanggo. Gipatay usab niya ang unang anak sa mga mananap.
30. Niadtong gabhiona, nahigmata ang hari ug ang tanan niyang opisyal ug ang tanang Ehiptohanon ug nabati nila ang mga tiyabaw kay walay balay nga wala kamatyig anak nga lalaki.
31. Niadto gayong gabhiona gipatawag sa hari si Moises ug si Aaron ug giingnan niya, “Hala, panglakaw na kamo gikan sa akong nasod ug simbaha ang Ginoo sumala sa inyong gihangyo.
32. Dad-a ang inyong mga karnero, mga kanding ug mga baka ug panglakaw kamo. Pag-ampo usab nga panalanginan ako.”
33. Gipabiya pagdali sa mga Ehiptohanon ang mga Israelita gikan sa Ehipto. Miingon sila, “Mangamatay kaming tanan kon dili kamo mamahawa.”
34. Busa gidala sa katawhan ang ilang minasang harina nga wala pay patubo ug gipas-an ang masahan nga giputos nila sa ilang bisti.
35. Gibuhat sa mga Israelita ang giingon ni Moises kanila nga mangayo silag mga alahas nga plata ug bulawan ug mga bisti sa mga Ehiptohanon.
36. Gihimo sa Ginoo nga motahod ang mga Ehiptohanon sa mga Israelita busa gihatag nila ang gipangayo sa mga Israelita. Sa maong paagi nakuha sa mga Israelita ang mga bahandi sa mga Ehiptohanon.
37. Ang mga Israelita migikan sa Rameses paingon sa Sucot. Mga 600,000 ang mga lalaki. Wala ipha ang mga babaye ug mga bata. Nagbaktas sila.
38. Mikuyog usab kanila ang dakong panon sa nagkalainlaing mga tawo ug daghang mga karnero, mga kanding ug mga baka.
39. Nagluto silag pan nga walay patubo sa minasa nga harina nga dala nila gikan sa Ehipto. Wala kini kabutangig patubo kay giabog man sila sa mga Ehiptohanon ug wala na silay panahon sa pag-andam sa ilang pagkaon.
40. Ang mga Israelita nagpuyo didto sa Ehipto sulod sa 430 ka tuig.
41. Sa pagkatapos gayod sa 430 ka tuig, mipahawa sa Ehipto ang katawhan sa Ginoo.
42. Kadto ang gabii nga nagtukaw ang Ginoo aron pagdala kanila gawas sa Ehipto. Busa ang maong gabii gihalad ngadto sa Ginoo. Ang tanang kaliwatan sa mga Israelita magtukaw gayod sa maong gabii.
43. Ang Ginoo miingon kang Moises ug kang Aaron, “Mao kini ang mga patakaran sa pagsaulog sa Pagsaylo: Dili makakaon niini ang mga langyaw
44. apan makakaon niini ang tanang ulipon nga pinalit kon siya gituli na.
45. Dili makakaon niini ang dumuduong ug ang mga sinuholan nga trabahador.
46. Kan-on kini sa sulod sa balay diin kini lutoa. Ayaw pagdala niini sa gawas ug ayaw balia ang bisan unsang bukog.
47. Kinahanglan nga saulogon kini sa tibuok katilingban sa Israel.
48. Kon ang usa ka langyaw nga nagpuyo uban kaninyo buot mosaulog sa Pagsaylo pahinungod sa Ginoo, kinahanglan nga tulion una ninyo ang tanang mga lalaki sa iyang panimalay ug unya makaapil na siya sa kasaulogan kay isipon na man siya nga usa ka lumad nga Israelita. Apan ang dili tinuli dili gayod makakaon niini.
49. Ang maong patakaran sundon sa lumad nga Israelita ingon man sa mga langyaw nga nagpuyo tipon kaninyo.”
50. Gituman sa tanang mga Israelita ang gisugo sa Ginoo kang Moises ug kang Aaron.
51. Niadto gayong adlawa gidala sa Ginoo ang mga Israelita gawas sa Ehipto sumala sa ilang mga hut-ong.