1. “Pamati, O katawhan sa Israel! Niining adlawa manabok kamo sa Suba sa Jordan aron sa pagpanag-iya sa kayutaan sa mga katawhan nga mas gamhanan ug daghan pa kay kaninyo. Panag-iyahon ninyo ang ilang mga siyudad nga gipalig-onag mga paril nga habog kaayo.
2. Sumala sa inyong nasayran, dagko ug tag-as kining mga tawhana nga ginganlag mga Anakim ug nakabati kamo sa panultihon nga walay makabuntog niining mga higanteha.
3. Karon makita ninyo nga nag-una kaninyo ang Ginoo nga inyong Dios sama sa kalayo nga molamoy kanila. Busa pamatyon niya sila ug sumala gayod sa gisaad sa Ginoo kaninyo, mabuntog ninyo sila ug mapuo.
4. “Human unya abuga sa Ginoo nga inyong Dios ang mga katawhan alang kaninyo, ayaw kamo pag-ingon, ‘Gidala kami sa Ginoo dinhi aron manag-iya niining yutaa tungod kay takos man kami.’ Giabog sa Ginoo kining maong mga katawhan tungod sa ilang pagkadaotan.
5. Dili tungod sa inyong pagkamatarong o pagkamaayong tawo nga mapanag-iya ninyo ang ilang kayutaan. Giabog sila sa Ginoo nga inyong Dios tungod sa ilang pagkadaotan ug aron usab pagtuman sa iyang gipanumpaang saad ngadto sa inyong katigulangan nga si Abraham, si Isaac ug si Jacob.
6. Busa maila ninyo nga dili tungod sa inyong pagkamatarong nga gihatag kaninyo sa Ginoo kining maayong yuta kay kamo gahi mag ulo.
7. “Hinumdomi nga didto sa kamingawan gipakasuko ninyo ang Ginoo nga inyong Dios. Nagmasupilon kamo kaniya sukad pa gayod sa pagbiya ninyo sa Ehipto hangtod sa pag-abot ninyo dinhi.
8. Bisan gani didto sa Sinai gihagit ninyo siya ug nasuko siya pag-ayo kaninyo ug buot na lamang niya kamong puohon.
9. Mitungas ako sa bukid aron dawaton ang mga papan nga bato nga gisulatan sa kasabotan nga gihimo niya uban kaninyo. Nagpabilin ako didto sa bukid sulod sa 40 ka adlaw ug 40 ka gabii. Wala ako mokaon o moinom.
10. Gihatag kanako sa Ginoo ang duha ka papan nga bato nga gisulatan sa Dios pinaagi sa iyang tudlo. Nahisulat niini ang tanan nga giingon niya kaninyo didto sa bukid gikan sa taliwala sa kalayo samtang nagtigom kamo.
11. Pagkatapos sa 40 ka adlaw ug 40 ka gabii, gihatag kanako sa Ginoo ang duha ka papan nga bato nga gisulatan sa kasabotan.
12. “Ug miingon ang Ginoo kanako, ‘Lakaw! Pagdali kay ang imong katawhan nga gidala mo gikan sa Ehipto wala motuman sa gisugo ko kanila. Dali ra silang misimang sa dalan nga gipasubay ko kanila ug naghimo silag diosdios nga tinunaw.’
13. “Unya miingon pa gayod ang Ginoo kanako, ‘Nakita ko kon unsa kagahig ulo kining maong katawhan.
14. Ayaw ako pugngi kay puohon ko sila aron nga wala na gayoy mahinumdom kanila ug himoon ko gikan kanimo ang katawhan nga mas gamhanan ug daghan pa kay kanila.’
15. “Unya milugsong ako gikan sa bukid dala ang duha ka papan nga bato ug ang bukid nagdilaab sa kalayo.
16. Ug nakita ko nga nagpakasala kamo sa Ginoo nga inyong Dios kay nagbuhat man kamog diosdios nga nating baka nga tinunaw. Dali ra kamong misimang sa dalan nga gipasubay kaninyo sa Ginoo.
17. Ug gibundak ko ang duha ka papan nga bato ug napusgay kini diha sa inyong atubangan.
18. Unya mihapa na usab ako atubangan sa Ginoo sulod sa 40 ka adlaw ug 40 ka gabii ug nagpuasa tungod sa tanan ninyong sala kay gibuhat man ninyo ang wala kahimut-i sa Ginoo ug nakapasuko kini kaniya.
19. Nabalaka ako nga tungod sa iyang kasuko kaninyo, puohon kamo niya. Apan namati gihapon kanako ang Ginoo niadtong higayona.
20. Nasuko pag-ayo ang Ginoo kang Aaron ug buot niyang patyon si Aaron apan nag-ampo usab ako alang kang Aaron.
21. Ug gikuha ko ang nakaangin kaninyo sa pagpakasala nga mao ang hinimo ninyong nating baka. Gidaoban ko kini ug gitipaktipak. Unya gidugmok ko kini hangtod naagiw ug gilabog ko ang abo niini didto sa sapa nga nagdagayday gikan sa bukid.
22. “Ug inyo pa gayong gipalagot ang Ginoo didto sa Taber, sa Masa ug didto sa Kibrot Hataaba.
23. Sa dihang gipagikan kamo sa Ginoo didto sa Cades Barnea ug giingnan, ‘Lakaw kamo ug panag-iyaha ang yuta nga gihatag ko kaninyo,’ wala ninyo tumana ang sugo sa Ginoo nga inyong Dios ug wala kamo mosalig kaniya.
24. Nagmasupilon kamo kanunay sa Ginoo sukad pa gayod sa pagkaila ko kaninyo.
25. “Unya mihapa ako atubangan sa Ginoo sulod sa 40 ka adlaw ug 40 ka gabii kay miingon man ang Ginoo nga laglagon kamo niya.
26. Nag-ampo ako sa Ginoo, ‘O Ginoong Dios, ayaw intawon puoha ang imong katawhan kay ikaw ang tag-iya kanila. Giluwas mo sila pinaagi sa imong gahom ug gikuha gikan sa Ehipto.
27. Hinumdomi ang imong mga alagad nga si Abraham, si Isaac ug si Jacob. Ayaw intawon tagda ang kagahig ulo ug ang pagkadaotan ug ang sala niining maong katawhan.
28. Kon laglagon mo sila, moingon unya ang mga tawo didto sa Ehipto nga ang Ginoo wala makahimo pagdala kanila ngadto sa yuta nga gisaad niya kanila. Iya hinuon silang gidala ngadto sa kamingawan aron iyang pamatyon didto kay gikasilagan man niya sila.
29. Sila imong katawhan nga imong gikuha pinaagi sa imong dakong gahom.’