43. Ek straf jou soos Ek jou moet straf oor wat jy gedoen het. Ek doen dit omdat jy vergeet het wat gebeur het toe jy jonk was. Jy het My baie kwaad gemaak toe jy al hierdie dinge gedoen het.”Dit het die Here gesê, Hy wat Here is.“Ek haat al hierdie dinge wat jy doen, jy het sleg gelewe.
44. Luister, die mense wat graag spreekwoorde maak, sal oor jou ook ’n spreekwoord maak. Hulle sal sê: ‘Soos die ma is, so is haar dogter.’
45. Jy is jou ma se dogter, jou ma wat haar man en haar kinders gehaat het. Jy is jou susters se suster, jou susters wat hulle mans en hulle kinders gehaat het. Julle ma was ’n Hetiet en julle pa was ’n Amoriet.
46. Samaria is jou oudste suster. Sy en haar dogters het noord van jou gewoon. Sodom is jou jonger suster. Sy en haar dogters het suid van jou gewoon.
47. Jy het soos hulle gelewe en jy het die dinge gedoen wat hulle gedoen het, die dinge wat Ek haat. Maar jy was nie tevrede nie, jy het nog slegter as hulle gelewe.”
48. Die Here, Hy wat Here is, sê: “Jou suster Sodom en haar dogters het nie so baie sonde gedoen soos jy en jou dogters nie. Dit is seker, so seker soos Ek lewe.
49. Luister, jou suster Sodom was trots en selfsugtig. Sy en haar dogters het baie kos gehad, te veel kos, maar hulle het niks gedoen om mense te help wat hulleself nie kon help nie, mense wat niks gehad het nie.
50. Hulle was hoogmoedig en hulle het dinge gedoen wat Ek haat. Ek het dit gesien en Ek het hulle laat verdwyn, jy het dit gesien.
51. Samaria het baie minder sonde gedoen as jy, hulle het minder as die helfte gedoen wat jy gedoen het. Jy het baie meer dinge gedoen wat Ek haat. Jy het baie dinge gedoen wat Ek haat, so baie dinge dat dit gelyk het of jou susters reg lewe.
52. Jy moet baie skaam wees daaroor. Jy het so baie sonde gedoen, so baie dinge wat Ek haat, dat dit lyk of hulle beter gelewe het as jy. Jy moet nou baie skaam word, jy het so baie verkeerde dinge gedoen dat dit lyk of jou susters reg gelewe het.
53. Maar Ek sal dit weer goed laat gaan met Sodom en haar dogters en met Samaria en haar dogters, en Ek sal dit ook goed laat gaan met jou, saam met hulle.
54. Jy sal dan die slegte naam moet dra en jy sal baie skaam moet wees oor alles wat jy gedoen het om dit beter te laat gaan met hulle.
55. Jou suster Sodom en haar dogters sal weer die stad word wat hulle was, Samaria en haar dogters sal weer die stad word wat hulle was, en jy en jou dogters sal weer die stad word wat julle was.
56. Jy het graag gepraat oor jou suster Sodom. Dit was toe jy hoogmoedig was,
57. dit was toe almal nog nie gesien het hoe sleg jy is nie. Die Arameërs en almal wat naby hulle woon, spot nou vir jou, en al die Filistyne wat rondom jou is, lag vir jou.
58. Dit is jou slegte lewe wat jou nou laat swaarkry, al die dinge wat jy gedoen het wat Ek haat.”Dit is wat die Here gesê het.