8. En die ander lam moet jy teen die aand berei; met dieselfde spysoffer as in die môre en met die drankoffer wat daarby behoort, moet jy dit berei — ’n vuuroffer van lieflike geur aan die Here.
9. MAAR op die sabbatdag twee jaaroud lammers sonder gebrek en twee-tiendes van ’n efa fynmeel as spysoffer, met olie gemeng, en die drankoffer wat daarby behoort.
10. Dit is die brandoffer van die sabbat op elke sabbat, behalwe die voortdurende brandoffer en die drankoffer wat daarby behoort.
11. En by die begin van julle maande moet julle ’n brandoffer aan die Here bring: twee jong bulle en een ram, sewe jaaroud lammers sonder gebrek;
12. en drie-tiendes van ’n efa fynmeel as spysoffer, met olie gemeng, vir elke bul, en twee-tiendes fynmeel as spysoffer, met olie gemeng, vir die een ram;
13. en een-tiende fynmeel as spysoffer, met olie gemeng, vir elke lam. Dit is ’n brandoffer, ’n lieflike geur, ’n vuuroffer aan die Here.
14. En hulle drankoffers moet wees ’n half-hin wyn vir ’n bul en ’n derde van ’n hin vir ’n ram en ’n kwart-hin vir ’n lam. Dit is die brandoffer by elke nuwemaan, vir die maande van die jaar.
15. Ook moet een bokram as sondoffer aan die Here berei word, behalwe die voortdurende brandoffer en die drankoffer wat daarby behoort.
16. EN in die eerste maand, op die veertiende dag van die maand, is die pasga van die Here.
17. En op die vyftiende dag van hierdie maand is dit fees; sewe dae lank moet ongesuurde brode geëet word.
18. Op die eerste dag moet daar ’n heilige samekoms wees; géén beroepswerk mag julle doen nie.
19. Maar julle moet as vuuroffer, as brandoffer aan die Here bring: twee jong bulle en een ram en sewe jaaroud lammers; sonder gebrek moet hulle vir julle wees.
20. En hulle spysoffer fynmeel met olie gemeng: drie-tiendes van ’n efa vir ’n bul en twee-tiendes vir ’n ram moet julle berei.
21. Een-tiende moet jy vir elke lam van die sewe lammers berei.