1. Yaba bana ba Iseraele ba boela ba etsa ho leng hobe pela Jehova, mme Jehova a ba neela matsohong a Bamidiane ka dilemo tse supileng.
2. Bamidiane ba tshwenya Baiseraele haholo, bana ba Iseraele ba ba ba tshabela diqhobong tse dithabeng, le mahaheng, le diforong ke ho tshaba Bamidiane.
3. Enere Baiseraele ha ba lemile, Bamidiane, le Baamaleke, le bana ba Botjhabela ba ne ba nyoloha ba futuhile.
4. Ba fihle, ba emise pela bona, ba senye mabele masimong, ho ya fihla Gasa, ba sa siele Baiseraele dijo, leha e le nku, kapa kgomo, kapa esele.
5. Ba ne ba tla ka mehlape ya bona le ditente tsa bona, ba tle ba le ka ka ditsie, ba se na ho balwa, bona le dikamele tsa bona; mme ba ne ba senya lefatshe.
6. Baiseraele ba fumanehiswa haholo ke Bamidiane, bana ba Iseraele ba ba ba howeletsa ho Jehova.
7. Eitse hobane bana ba Iseraele ba howeletse ho Jehova, ka baka la Bamidiane,
8. Jehova a romela bana ba Iseraele monna wa moporofeta, a tla, a re ho bona: Ho itswe ke Jehova, Modimo wa Iseraele: Ke le nyolotse Egepeta, ka le ntsha tlung ya bohlanka;
9. ka le namolela matsohong a Baegepeta, le matsohong a bohle ba neng ba le tshwenya; ka ba lelekisa pela lona, ka ba ka le nea lefatshe la bona;
10. mme ka re ho lona: Ke nna Jehova, Modimo wa lona, le se ke la tshaba medimo ya Baamore, bao le ahileng naheng ya bona. Empa ha le a ka la mamela lentswe la ka.
11. Yaba lengeloi la Jehova le tla, la dula tlasa sefate sa terebinthe se Ofra, e leng sa Joase, Moabiesere, mme Gideone, mora hae, o ne a pola koro sehatelong, hore a tle a e patele Bamidiane.
12. Lengeloi la Jehova la mo hlahela, la re ho yena: Jehova o na le wena, monna wa senatla!
13. Gideone a re ho lona: Oho, Monghadi, ha ekaba Jehova a ena le rona, tseo tsohle di re hlaheletseng? E kae mehlolo ya hae kaofela eo bontata rona ba re boleletseng yona, ba re: Na hase Jehova ya re nyolotseng Egepeta? Jwale, Jehova o re furaletse, o bile o re neetse matsohong a Bamidiane!
14. Yaba Jehova o retelehela ho yena, a re: Eya ka matla ana a hao, o namolele Baiseraele matsohong a Bamidiane. Ha ke re, ke o romile na?
15. Gideone a re ho yena: Oho, Monghadi, ke tla namolela Iseraele kang? Bona, ntlo ya heso ke e fumanehileng hara matlo a Manasse, mme nna ke e monyenyane ho ba ntlo ya ntate.
16. Jehova a re ho yena: Ruri, ke tla ba le wena, mme o tla hlola Bamidiane, jwaloka hoja ke motho a le mong.
17. Gideone a re ho yena: Ha ekaba ke bone mohau ho wena, ako nnee pontsho ya hobane ke wena ya buang le nna.
18. O se ke wa tloha mona, ke eso ho kgutlele ho wena, ka o tlisetsa nyehelo ya ka, ka e bea pela hao. Eo a re: Ke tla dula, o be o boye.
19. Yaba Gideone o ya, a lokisa potsanyane, a nka le efa ya phofo, a etsa dinkgwana tse se nang ditomoso; a bea nama serotong, a tshela moro pitseng; a mo tlisetsa tsona tlasa sefate sa terebinthe, mme a mmeela tsona.
20. Lengeloi la Jehova la re ho yena: Nka nama le dinkgwana tse se nang ditomoso, o di bee lefikeng leno, mme o tsholle moro hona teng. A etsa jwalo.
21. Lengeloi la Jehova la isa ntlha ya lere le letsohong la lona, la ama nama le dinkgwana tse se nang ditomoso; ha tswa mollo lefikeng, mme wa tjhesa nama le dinkgwana tse se nang ditosomo; lengeloi la Jehova la ntoo tloha ho yena.
22. Kahoo, Gideone a bona hobane ke lengeloi la Jehova. Gideone a re: Ho madimabe nna, Monghadi Jehova, hobane ke bone lengeloi la Jehova, re tadimane difahleho le lona!
23. Jehova a re ho yena: Kgotso e be ho wena! O se ke wa tshaba; ha o ka ke wa shwa.
24. Ebile Gideone o hahela Jehova aletare hona teng, a e rea lebitso la Jehova-Shalome (Jehova ke kgotso). E sa le teng Ofra wa Baabiesere ho fihlela kajeno.
25. Bosiung bona boo, Jehova a re ho yena: Nka pohwana ya ntatao, le poho e nngwe e dilemo tse supileng, mme o heletse aletare ya Baale, e leng ya ntatao, mme o reme ashera e pela yona.
26. O hahele Jehova, Modimo wa hao, aletare hlorong ya seqhobo seno, ka mokgwa o tshwanelehang; o ntoo nka poho ya bobedi, o e etse setjheso ka sefate sa ashera eo o tla e rema.
27. Yaba Gideone o nka batho ba leshome ba bahlanka ba hae, a etsa kamoo Jehova a mmoleletseng kateng; mme kahobane a ne a tshaba ba ntlo ya ntatae, le batho ba motse, a etsa bosiu, e seng motshehare.
28. Hosasane, ha batho ba motse ba tsoha ba bona aletare ya Baale e heleditswe, le ashera ya teng e remilwe, poho ya bobedi yona e entswe setjheso aletareng e hahilweng.
29. Ba botsana, ba re: Ke mang ya entseng hoo? Ha ba batla le ho botsisisa, ha thwe: Hoo ho entswe ke Gideone, mora Joase.
30. Batho ba motse ba re ho Joase: Ntsha mora hao, a shwe, hobane o heleditse aletare ya Baale, mme o remile ashera e pela yona.
31. Joase a fetola batho kaofela ba tlileng ho yena, a re: Hleka ke lona le tla tsekela Baale na? Na ke lona le tla mo pholosa na? Ya tla mo tsekela o tla shwa e eso ho be hosasa. Ha Baale e le modimo, a itsekele e le yena, ha aletare ya hae e heleditswe.
32. Tsatsing lona leo, Gideone a rewa lebitso la Jerubbaale (Baale a ke a tseke), ha thwe: Baale a ke a mo tsekise, ha a heleditse aletare ya hae.
33. Yaba Bamidiane kaofela le Baamaleke le bana ba Botjhabela ba phutheha, ba tshela Jordane, mme ba emisa lehwatateng la Jisreele.
34. Gideone a apeswa moya wa Jehova, a ba a letsa terompeta, mme Baabiesere ba memelwa ho yena ka mokgosi.
35. Hape, a romela manqosa ho Bamanasse bohle, le bona ba phuthehela ho yena ka mokgosi; a romela manqosa le ho Baasere, le ho Basabulone, le ho Banefthali; le bona ba nyoloha ho tla teana le bona.
36. Gideone a re ho Modimo: Ha o fela o rata ho namolela Iseraele ka letsoho la ka, jwalokaha o boletse,
37. bona, ke tla bea letlalo lena la nku le nang le boya seotlong; ha phoka e lala hodima letlalo feela, ha oma kahohle fatshe, ke tla tseba kahoo hobane o tla namolela Iseraele ka letsoho la ka, jwalokaha o boletse.
38. Mme ha eba jwalo. Hosasane, ha a tsoha ka meso, a hlotla letlalo, a ntsha phoka letlalong, a tlatsa mohope ka metsi a yona.
39. Yaba Gideone o re ho Modimo: Kgalefo ya hao e se ke ya ntukela; ke sa bua hang feela; nke ke leke hape, hang feela, ka letlalo, ke re: Letlalo le ke le fumanwe le omile le nnotshi, phoka e letse kahohle fatshe.
40. Modimo wa etsa jwalo bosiung boo: letlalo la fumanwa le omile le nnotshi, phoka e letse kahohle fatshe.