1. Yaba banna ba Efraime ba phutheha, ba fetela nqa leboya, ba tla, ba re ho Jafeta: Mohla o neng o futuhela bana ba Ammone, ha o a ka wa re bitsa keng, hore re ye le wena? Jwale, re tla o tjheselletsa tlung ya hao.
2. Jafeta a re ho bona: Nna le setjhaba sa heso, re kile ra ba le kgang e kgolo le bana ba Ammone; nkile ka le bitsa, empa ha le a ka la nnamolela matsohong a bona.
3. Eitse ha ke bona hobane le sa nnamolele, ha ke a ka ka re letho ka ho phela ha ka, ka mpa ka fetela pele ho bana ba Ammone, mme Jehova a ba neela matsohong a ka. Le tletseng kajeno, ha le tlile ho ntwantsha?
4. Yaba Jafeta o bokella banna bohle ba Gileade, a lwantsha Efraime; banna ba Gileade ba hlola Baefraime, kahobane ba ne ba itse: Lona Bagileade, le bathobi ba Efraime, le dutse hara Efraime le Manasse.
5. Bagileade ba raka Baefraime, ba tshwara madiboho a Jordane: mme enere ha e mong wa Baefraime ba balehang a re: Ntloheleng ke tshele, banna ba Gileade ba ne ba re: Na o Moefraime na? Eo o ne a re: Tjhe!
6. Ebe ba re ho yena: Bolela Shibbolethe hle; ebe o re: Sibbolethe; kahobane a sa tsebe ho bitsa lentswe leo hantle; ebe ba a mo tshwara, ba mmolaya madibohong a Jordane. Mohlang oo, ha bolawa Baefraime ba dikete tse mashome a mane a metso e mmedi.
7. Jafeta a ahlolela Iseraele ka dilemo tse tsheletseng. Yaba Jafeta Mogileade o a shwa, a patwa motseng o mong wa Gileade.
8. Kamora hae, Ibtsane, wa Bethlehema, a ahlolela Iseraele.
9. A ba le bara ba mashome a mararo; hape, a nyallwa baradi ba hae ba mashome a mararo, mme a batlela bara ba hae barwetsana ba mashome a mararo kahosele.
10. A ahlolela Iseraele ka dilemo tse supileng. Ibtsane a ntoo shwa, mme a patwa Bethlehema.
11. Kamora hae, Elone wa Sabulone a ahlolela Iseraele; a ahlolela Iseraele ka dilemo tse leshome.
12. Elone wa Sabulone a ntoo shwa, mme a patwa Ajalone, naheng ya Sabulone.
13. Kamora hae, Abdone, mora Hillele, wa Pirathone, a ahlolela Iseraele.
14. A ba le bara ba mashome a mane le ditloholo tse mashome a mararo, ba neng ba palama diesele tse mashome a supileng. A ahlolela Iseraele ka dilemo tse robileng meno e le mmedi.
15. Yaba Abdone, mora Hillele, wa Pirathone, o a shwa, mme a patwa Pirathone, naheng ya Efraime, thabeng ya Baamaleke.