1. Kur u lind Jezui në Betlehem të Judesë, në kohën kur ishte mbret Herodi, disa dijetarë erdhën nga Lindja në Jerusalem
2. dhe pyetën: «Ku është mbreti i sapolindur i judenjve? Sepse pamë yllin e tij në Lindje dhe erdhëm ta adhurojmë».
3. Kur e dëgjoi këtë mbreti Herod, u shqetësua ai dhe tërë Jerusalemi.
4. Atëherë mblodhi të gjithë kryepriftërinjtë e skribët e popullit dhe i pyeti se ku duhej të lindte Krishti.
5. Ata i thanë: «Në Betlehem të Judesë, sepse kështu shkruan profeti:
6. E ti, Betlehem,tokë e Judesë, nuk je aspak më i vogli ndër prijësit e Judesë, sepse prej teje do të lindë një prijës, që do të jetë bariu i popullit tim Izraelit».
7. Atëherë Herodi thirri fshehurazi dijetarët dhe mori vesh prej tyre kohën e saktë se kur ishte shfaqur ylli.
8. Pastaj i nisi për në Betlehem dhe u tha: «Shkoni e pyesni me hollësi për fëmijën dhe kur ta gjeni, më lajmëroni që të vij edhe unë e ta adhuroj».
9. Pasi dëgjuan mbretin, u nisën. Dhe ja, ylli që kishin parë në lindje u printe derisa u ndal në vendin ku ishte fëmija.