1. Atëherë Bildadi nga Shuahu u përgjigj dhe tha:
2. "Deri kur do të flasësh në këtë mënyrë, dhe fjalët e gojës sate do të jenë si një erë e furishme?
3. A mundet Perëndia të shtrembërojë gjykimin dhe i Plotfuqishmi të përmbysë drejtësinë?
4. Në rast se bijtë e tu kanë mëkatuar kundër tij, ai i ka braktisur në prapësinë e tyre.
5. Por në rast se ti e kërkon Perëndinë dhe i lutesh fort të Plotfuqishmit,
6. në rast se je i pastër dhe i ndershëm, me siguri ai do të ngrihet në favorin tënd dhe do të rivendosë selinë e drejtësisë sate.
7. Ndonëse gjendja jote e kaluar ka qenë një gjë e vogël,
8. e ardhmja jote do të jetë e madhe. Pyet, pra, brezat që shkuan dhe shqyrto gjërat e zbuluara nga etërit e tyre;
9. ne në të vërtetë i përkasim së djeshmes dhe nuk dimë asgjë, sepse ditët tona mbi tokë janë si një hije.
10. A nuk do të mësojnë vallë ata dhe nuk do të flasin, duke nxjerrë fjalë nga zemra e tyre?
11. A mund të rritet papirusi jashtë moçalit dhe a mund të zhvillohet xunkthi pa ujë?
12. Ndërsa është ende i gjelbër, pa qenë prerë, ai thahet para çdo bari tjetër.
13. Këto janë rrugët e të gjithë atyre që harrojnë Perëndinë; kështu shpresa e të paudhit tretet.