1. Edhe këto janë fjalë të urta të Salomonit, të transkriptuara nga njerëzit e Ezekias, mbretit të Judës.
2. Është lavdi e Perëndisë të fshehësh një gjë, por është lavdi e mbretërve ta hetosh atë.
3. Qiejt për lartësinë e tyre, toka për thellësinë e saj dhe zemra e mbretërve janë të panjohshëm.
4. Hiq zgjyrën nga argjendi dhe ka për të dalë një enë për argjendarin.
5. Largo të pabesin nga prania e mbretit dhe froni i tij do të bëhet i qëndrueshëm në drejtësi.
6. Mos u përlëvdo në prani të mbretit dhe mos zër vendin e njerëzve të mëdhenj,
7. sepse është më mirë të thuhet: "Ngjitu këtu lart", se sa të të ulin përpara princit, që sytë e tu kanë parë.
8. Mos bëj padi me tepër nxitim, sepse në fund nuk do të dish çfarë të bësh, kur i afërmi yt do të të ketë bërë me turp.
9. Diskutoje padinë tënde kundër të afërmit tënd, por mos e zbulo sekretin e një tjetri,
10. me qëllim që ai që të dëgjon të mos të të diskreditojë dhe nami yt të njolloset përgjithnjë.
11. Një fjalë e thënë në kohën e duhur është si molla të arta mbi një enë argjendi.
12. Për një vesh të bindur, një i urtë që qorton është si një vath i artë, një zbukurim prej ari të kulluar.
13. Një lajmëtar besnik është, për ata që e dërgojnë, si freskia e borës në kohën e korrjes, sepse ai e freskon shpirtin e zotit të tij.
14. Ai që mburret duke gënjyer se ka bërë një dhuratë është si retë dhe era pa shi.
15. Me durimin i mbushet mendja një princi dhe gjuha e ëmbël thyen kockat.