3. ‘Ona pu‘e lea le temoni e le agelu o Refaelu ma ‘ua fusifusi ‘iā te ia i le fanua tu‘ufua i le itū i uta o Aikupito.
4. ‘Ona apoapoa‘i atu lea o Tovia i le teine, ‘ua fa‘apea atu: Sara e, tula‘i ia, ‘ia tā ‘ai‘oi atu i le Atua i le aso nei ma le aso a taeao ma le aso i ona tala atu, auā o po nei e tolu e fa‘atasia ai i tā‘ua ma le Atua; ‘ae a mavae lona tolu o po, ‘ona tā nonofo lea i la tā‘ua fa‘aipoipoga.
5. Auā o i tā‘ua o le fānau a le ‘au pa‘ia ma ‘ua lē mafai ‘ona fa‘atasia i tā‘ua e pei o nu‘u ‘ese ‘ua latou lē iloa le Atua.
6. ‘Ona tula‘i loa lea o i lā‘ua ma ‘ua la tatalo fa‘atasi ma le tauānau ‘ina ‘ia fa‘asaogalemūina i lā‘ua.
7. Ma ‘ua fai ane o Tovia: Le Ali‘i e, le Atua o matou tamā, ‘ia fa‘amanū atu ‘iā te oe le lagi ma le lalolagima le sami ma vaipuna ma vaitafe‘atoa ma mea uma o i ai na faia lava e oe.
8. Na e faia Atamu i le efuefu o le ‘ele‘ele, na e tu‘u atu fo‘i ‘iā te ia o Eva e fai mōna fesoasoani.
9. A o lenei, le Ali‘i e, ‘ua e silafia ‘ua ‘ou talia lo‘u nei tuafafine ma a‘u avā,e lē ‘ona o le tu‘inanau ‘ae o le mana‘o tasi i so mā‘ua gafa,‘ina ‘ia fa‘amanūina ai o lou suafa i le fa‘avavau fa‘avavau lava.
10. ‘Ua fai ane fo‘i o Sara:Alofa mai ‘iā te i mā‘ua,le Ali‘i e, alofa mai ‘iā te i mā‘ua.Le Ali‘i e, alofa mai ‘iā te i mā‘ua;‘ia fa‘alevaleva o mā‘ua olagama ‘ia mālōlōina pea o i mā‘ua.
11. ‘Ona o‘o lea i le itūlā e vivini ai moa, ‘ua poloa‘i e Rakuelu ‘ia ‘a‘amia ana ‘au‘auna ma ‘ua latou ō ma ‘ia e ‘eli se tu‘ugamau.
12. Auā ‘ua fa‘apea ifo o ia: Atonu ‘ua o‘o fo‘i ‘iā te ia le mea na o‘o i tane ia e to‘afitu na ō atu i le teine.
13. ‘Ua uma ‘ona sauni le tu‘ugamau, ‘ona toe fo‘i lea o Rakuelu i lana avā, ‘ua fai atu ‘iā te ia:
14. ‘Ia e ‘a‘auina atu le tasi o a‘u ‘au‘auna fafine, ‘ia va‘ava‘ai po ‘ua oti o ia, ‘ina ‘ia ‘ou tanu ‘iā te ia a o le‘i tafa mai ata.
15. A ‘ua ia ‘a‘auina atu le tasi o ana ‘au‘auna fafine, ‘ua ia ulu atu i le potu ma ‘ua mā‘ua ai i lā‘ua, o mālōlōina ma saogalemū, o la momoe fa‘atasi.
16. ‘Ua toe fo‘i mai o ia ma ‘ua tala‘i atu le tala lelei. ‘Ona la fa‘amanū atu lea i le Ali‘i, o Rakuelu ma lana avā o Ana:
17. ma ‘ua la fai ane:‘Ua ma fa‘amanū atu ‘iā te oe, le Ali‘i e, le Atua o Isaraelu,auā ‘ua lē o‘o le mea sa ma manatu i ai;