1. A ē alu atu e tau ai se tau‘a ma lou fili; a e iloa atu solofanua, ma kariota, ma le nu‘u e sili ‘ona to‘atele ‘iā te oe, ‘aua ne‘i e fefe ‘iā te i latou; auā o ‘iā te oe le ALI‘I lou Atua, o lē na ‘aveina a‘e oe a‘i le nu‘u o Aikupito.
2. A latalata ‘ona ‘outou tau, ‘ona fa‘alatalata atu lea o le ositaulaga, ma tautalatala i le nu‘u,
3. e fa‘apea atu ‘iā te i latou: “Isaraelu e, fa‘alogo mai ia, ‘ua ‘outou fa‘alatalata atu i le aso nei e tau le tau‘a ma o ‘outou fili; ‘aua ne‘i fa‘avaivai o ‘outou loto, ‘aua tou te fefefe, ‘aua tou te matata‘u, ‘aua fo‘i tou te gatete ‘iā te i latou.
4. Auā o le ALI‘I lo ‘outou Atua tou te ō ma ia, na te tau ai la ‘outou tau‘a ma o ‘outou fili, na te fa‘aolaina ‘outou.”
5. ‘Ia fai atu fo‘i le ‘au faipule i le nu‘u, ‘ia fa‘apea atu, “O ai se tagata ‘ua faia sona fale fou, ‘ae le‘i fa‘aulufaleina? ‘inā alu o ia, ‘ina fo‘i atu i lona fale, ne‘i oti o ia i le tau‘a, ‘ona fa‘aulufaleina ai lea e se tasi.
6. O ai fo‘i se tagata ‘ua faia se tōvine, ‘ae le‘i fa‘atagaina? ‘inā alu ia, ma fo‘i atu i lona fale, ne‘i oti o ia i le tau‘a, ‘ona fa‘atagaina ai lea e se tasi.
7. O ai fo‘i se tagata ‘ua la fai le feagaiga ma se fafine e fai māna avā, ‘ae le‘i fa‘atasia? ‘inā alu ia, ma fo‘i atu i lona fale, ne‘i oti o ia i le tau‘a, ‘ona fai ai lea o ia ma avā a se tasi tagata.”
8. ‘Ia toe tautala atu fo‘i le ‘au faipule i le nu‘u, ‘ia latou fa‘apea atu, “O ai ‘ea se tagata e fefe, ma fa‘avaivai lona loto? ‘inā alu ia, ma fo‘i atu i lona fale, ne‘i fa‘avaivai loto i ona uso e pei o lona loto.”
9. A uma fo‘i ‘ona tautala atu o le ‘au faipule i le nu‘u, ‘ona tofia lea e i latou o ali‘i e ‘ave ‘au e ta‘ita‘iina le nu‘u.
10. A fa‘alatalata i se ‘a‘ai e tau ai le tau‘a, ‘ona e vala‘au atu lea i ai ‘ia ola le tau‘a;
11. ‘āfai fo‘i e tali mai i latou ‘iā te oe, ‘inā ola ia, ma latou fa‘aavanoa faitoto‘a ‘iā te oe, ‘ona ‘avea ai lea o tagata uma e maua ai ma e ‘aumai taulaga ‘iā te oe, ma latou ‘au‘auna ‘iā te oe.
12. ‘Ae ‘āfai e lē mafai ‘iā te i latou ‘ona fai o se leleiga ma oe, ‘ae fia tau lava i latou ma oe, ‘ona e si‘osi‘oina atu ai lea;
13. pe a tu‘uina mai fo‘i e le ALI‘I lou Atua ‘iā te oe, ‘ia e fasiotia tane uma lava o i ai i le pelu;