11. ‘Ona ia fa‘apea mai lea ‘iā te a‘u, “Tanielu e, o le tagata ‘ua alofateleina, ‘ia e mafaufau i ‘upu ‘ou te fai atu ai, ‘iā te oe ma ‘ia e tu i luga; auā ‘ua ‘auina mai nei a‘u ‘iā te oe.” ‘Ua uma ‘ona fetalai mai ‘iā te a‘u o nei ‘upu, ‘ona ‘ou tu ai lea, ‘ua ‘ou gatete.
12. ‘Ona fa‘apea mai ai lea o ia ‘iā te a‘u, “Tanielu e, ‘aua le fefe; auā talu le lua‘i aso na e sauni ai lou loto e mafaufau ma fa‘atigāina oe e oe i luma o lou Atua, sa fa‘afofogaina au ‘upu, ‘ua a‘u sau fo‘i ‘ona o au ‘upu.
13. A o le ali‘i o le mālō o Peresia na ia tete‘e ‘iā te a‘u i po e luafulu ma le tasi; fa‘auta fo‘i, o Mekaeli o so le ‘au ali‘i sili ia, na ia maliu mai e fesoasoani mai ‘iā te a‘u; na tu‘ua fo‘i a‘u i lea mea fa‘atasi ma tupu o Peresia.
14. O lenei, ‘ua a‘u sau e fa‘ailoa atu ‘iā te oe mea e tutupu i lou nu‘u i ona po amulī; auā e tuai ona po o le fa‘aaliga.”
15. ‘Ua ia fetalai mai na ‘upu ‘iā te a‘u, ‘ona ‘ou fa‘asaga lea o‘u mata i le ‘ele‘ele, ‘ua ‘ou le magagana.
16. Fa‘auta fo‘i, o le tasi e pei se tagata ‘ua pa‘i mai i o‘u laugutu; ‘ona ‘ou tautala atu lea, ‘ua fa‘apea atu i lē ‘ua tu mai i o‘u luma, “Le ali‘i e, ‘ua a‘u puapuagātia ‘ona o le fa‘aaliga, ‘ua leai se malosi ‘ua toe ‘iā te a‘u.
17. ‘Ua mafai fa‘apefea le ‘au‘auna a lo‘u nei ali‘i ‘ona tautala ma lo‘u nei ali‘i? auā o a‘u ‘ua leai lava so‘u malosi, ‘ua leai fo‘i se mānava ‘ua toe ‘iā te a‘u.”
18. ‘Ona toe pa‘i mai lea ‘iā te a‘u o le tasi ‘ua, tino mai pei se tagata, ‘ua ia fa‘amalosi mai ‘iā te a‘u.