1. ‘Aua ‘e te tauivi atu i ‘oloa o le amioletonu,‘aua fo‘i ‘e te fa‘apea ifo, “‘Ua lava a‘u mea ‘ou te ola ai.”Auā e lē aogā lava ia i ona po o le fa‘asalaga ma le tofotofoga.
2. ‘Aua ‘e te ‘ana‘ana i tu‘inanau o lou loto ma lou tino malosi.
3. ‘Aua fo‘i ‘e te fa‘apea ifo, “‘Ua ‘ou malosi lava! po o ai e tāofi ‘iā te a‘u i a‘u amioga?”Auā o le Atua lava na te taui ma sui ‘iā te oe.
4. ‘Aua ‘e te fa‘apea ifo, “‘Ua ‘ou agasala, se ā se leaga ‘ua o‘o mai ai ‘iā te a‘u!”Auā e telegese le fa‘asalaga a le Silisili‘ese.
5. ‘Ia i ai pea sina ou fefe i agasala ‘ua fa‘amāgaloina,‘aua ‘e te fa‘aopoopo ai le agasala i luga o le agasala.
6. ‘Aua fo‘i ‘e te fa‘apea ifo, “E tele le agaalofa o le Ali‘i,e alofa lava ia i le faula‘iga o a‘u agasala;”
7. auā e vāvālalata lona agaalofa ma lona to‘asā,e fa‘asaga atu fo‘i lona to‘atama‘i i tagata agasala.
8. ‘Aua ne‘i e fa‘atuai lau liliu atu i le Ali‘i,‘aua le tolo i tua i lea aso ma lea aso,
9. auā e fa‘afuase‘i ‘ona pesi mai lona to‘asā;e fa‘aumatia oe i le aso o le fa‘asalaga.
10. ‘Aua ‘e te fa‘alagolago i ‘oloa o le amioletonu,auā e lē aogā lava ‘iā te oe i le aso o le tofotofoga ma le fa‘asalaga.
11. ‘Aua ne‘i lūlūina oe i matagi uma, ‘aua fo‘i ‘e te savali i ala uma,auā e fa‘apea ‘ona mautinoa o le tagata agasala, ‘ona ‘ua fa‘agutugutulua.
12. ‘Ia e mautū i le ala o le Ali‘i ma le fa‘amaoni o lou mafaufau ma lou malamalama;‘ia fa‘atasi pea ma oe le ‘upu o le filemū ma le amiotonu.
13. ‘Ia e to‘aga i fa‘alogo i le ‘upu, ‘ina ‘ia malamalama ai ‘iā te oe,‘ona e fai ai lea ma le mafaufau le tali e tatau ai.
14. ‘Āfai ‘ua e atamai, ‘ia e tali i lē lua te tuā‘oi;a leai, ‘ia e tu‘u lou lima e tāofi a‘i lou gutu, ‘ina ne‘i lavea oe ‘ona o sau ‘upu e lē tusa, ‘ona e māsiasi ai lea.
15. O le mamalu ma le vi‘iga i le ‘upu a le tagata mafaufau,a o le laulaufaiva o lē ‘ua leai sona mafaufau e fa‘aumatia a‘i o ia.