11. ‘Ua na tofia le ‘au faipese e tutū i luma o le fatafaitaulaga,‘ua na lagi mai i o latou leo ni fati mālie.
12. ‘Ua na fa‘amamaluina o sauniga pa‘ia, ‘ua na tausi lelei i aso ma vaitausaga e o‘o i le fa‘ai‘uga o lona ola,‘ina ‘ia vi‘ia ai le suafa pa‘ia o le Ali‘i ma ‘ia āfua mai i le vaveao ona ta‘alili i pese le malumalu o le Atua.
13. Na sōloi‘esea e le Ali‘i ana agasala ma ‘ua na fa‘amaualugaina lona nifo e o‘o i le fa‘avavau;ma ‘ua tu‘u mai ‘iā te ia le tofi o le tupu ma le nofoāli‘i mamalu o Isaraelu.
14. ‘Ua soloa‘i ane ‘iā te ia lona atali‘i ‘ua tumu i le potoma ‘ua fa‘aumatia le malosi uma o le fili ‘ona o ia.
15. Na fai Solomona ma tupu i aso manuia, na tu‘uina i lalo e le Atua ona fili uma,‘ina ‘ia ati a‘e e ia se maota i lona suafa ma ia saunia e ia se malumalu e fa‘avavau.Ma‘eu le a‘oa‘oina o oe i aso o lou taule‘ale‘a,
16. ma ‘ua fa‘atumuina oe i le poto e pei o se vaitafe.Na so‘o le lalolagi i lou atamai,
17. na e fa‘ateleina o ‘upu lilo ma fa‘ata‘oto.Na ‘avea lou igoa e o‘o atu i motu mamao ma ‘ua alofagia oe i lou mālō filemū.
18. O au pese, o au fa‘ata‘oto, o au fa‘atusa ma au fa‘amatalaga na ofo ai le lalolagi.
19. Na ofo fo‘i i le suafa o le Ali‘i le Atua, lē ‘ua fa‘aigoaina le Atua o Isaraelu.
20. ‘Ua e fa‘aputuina le auro e pei o le ‘apa,‘ua e fa‘ateleina le ario e pei o le pulu.
21. ‘Ona e punou ai lea i fafine, ‘ua fa‘apologaina oe e lou tino.
22. ‘Ua e fa‘a‘ele‘elea lou mamalu, ‘ua e fa‘aleagaina lou gafa,‘ua e fa‘atō ifo le to‘asā i luga o lau fānau, e tigā i latou ‘ona o lou fa‘avalea.
23. ‘Ua e fa‘atupuina le vaeluaina o le mālō ma le pule‘aga faigatā i le pule mai o Efaraima.
24. ‘Ae le tu‘ulafoa‘i e le Atua lona agaalofa, na te lē fa‘aleagaina ma sōloi‘esea ana galuega,na te lē fa‘aumatia i lo latou tupu‘aga o fānau a lē na ia filifilia,na te lē sōloi‘esea le gafa o lē alofa i le Ali‘i.
25. ‘Ua na tu‘u mai ni ē totoe o Iakopo, o le tātupu mai le a‘a o Tavita.
26. Ma ‘ua mapu o Solomona fa‘atasi ma ona tua‘ā,
27. ma ‘ua na tu‘u mai lona atali‘i e soloa‘i ane ‘iā te ia, lē na fa‘aoso le valea o le nu‘u.
28. O Reopoamo, ‘ua leai sona mafaufau,‘ua na fa‘ate‘a le nu‘u ‘ona o lana taupulepulega.