4. E mafuta o ia ma tagata mamalu,e tu o ia i luma o le ali‘i sili.
5. E malaga atu o ia i le ‘ele‘ele o nu‘u ‘ese;auā e fia tofotofo e ia o mea lelei ma mea leaga o i le tagata.
6. E fa‘asaga atu lona loto e alaala i le vaveao i luma o le Ali‘i ‘ua na faia o ia,na te faia ana talosaga i luma o le Silisili‘ese.
7. E matala lona fofoga i le tatalo,na te fa‘atoga atu mo ana soligātulafono.
8. ‘Āfai e finagalo i ai le Ali‘i mamalu,e fa‘atumuina lava ia i le agaga o le malamalama.
9. E fa‘atō ifo e pei o le timuga o fa‘amatalaga o lona poto,na te vivi‘i atu i le Atua i lana tatalo.
10. Na te fa‘atonu lona mafaufau ma lona loto,na te su‘esu‘eina o mea lilo a le Atua.
11. Na te fa‘asalalauina o matā‘upu o lana a‘oa‘oga,e fai mōna mamalu le tulafono o le feagaiga a le Ali‘i.
12. E vi‘ia lona poto e le to‘atele,e lē galo lava o ia e o‘o i le gata‘aga.
13. E lē āu te‘a le manatu ‘iā te ia,e ta‘uta‘ua lona igoa i lea tupulaga ma lea tupulaga.
14. E talaina mai lona poto e nu‘u uma, e vi‘ia lava ia e le fa‘apotopotoga.
15. O aso e ola ai o ia, e sili ‘ona ta‘uta‘ua o ia i le to‘aafe;e o‘o fo‘i ‘ina mapu o ia, e sili lava ‘ona ta‘uleleia.
16. ‘Ou te tala atu pea o‘u mafaufauga,auā ‘ua fa‘atumuina lava lo‘u loto, e lē ma tāofia.
17. ‘Ua fa‘apea mai le leo:‘Inā fa‘alogo mai ia, ‘outou le fānau pa‘ia,‘ia fua ni ‘outou fua e pei o le la‘au o le rosa ‘ua totōina i tafatafa o le vaitafe.
18. ‘Ia manogi lelei mai e pei o le pulu o Lepanona.
19. ‘Ia ‘outou fua ni o ‘outou fuamātala e pei o le susanama ‘ia pua‘iina mai lo ‘outou nanamu, ‘ia fai ni lālā matagofie;ma ‘ia ‘outou pepese le pese o le vi‘iga, o vivi‘i atu i le Atua i ana galuega.
20. ‘Ia ‘outou vivi‘i i lē Silisili‘ese o lona suafa,‘inā fa‘amanū ia ‘iā te ia i ‘upu a ‘outou laugutuma le kitara ma ‘ia ‘outou ta‘uta‘u o fa‘apea mai:
21. “O galuega uma lava a le Ali‘i ‘ua ma‘eu ‘ona lelei.”‘Aua le fa‘apea mai: “Po o le a le mea nei”“po o le a le mea lenā?”Auā e fa‘aaogāina mea uma i le itū aso e tatau ai.
22. O lana fetalaiga na fa‘apotopoto ai le vai e pei o se fa‘aputuga;o le fetalaiga fo‘i a ona laufofoga na i ai o fa‘atanoa e talia ai o vai.