3. Na te fafaga ‘iā te ia i le areto o le ola ma le mafaufau ma fa‘ainu ‘iā te ia le vai fa‘aola o le poto;na te fa‘amausalī ‘iā te ia, ‘ona lē mafa‘agae‘etia lea o ia.
4. Na te tāofi mau ‘iā te ia, ‘ona lē māsiasi ai lea o ia;na te fa‘amamaluina ia i luma o ona soa.
5. Na te tālā ona laugutu i totonu o le fa‘apotopotoga ma fa‘atumu ‘iā te ia i le agaga o le potoma le mafaufau ma fa‘a‘ofu ‘iā te ia i le ‘ofu o le mamalu.
6. Na te fa‘aputuputu mo ia se tu‘ugā‘oa o le fiafia ma le ‘oli‘oli,na te faia mōna tofi le ta‘uleleia e fa‘avavau.
7. E lē maua le poto e tagata vālelea, ‘ae fa‘afetaia‘i ‘iā te ia tagata mafaufau.E lē iloa lava ia e tagata vālelea, auā e tu mamao lava ia ma le fa‘amaualuga ma le pepelo.
8. E lē manatua ia e tagata talapepelo;‘ae fa‘atasia ia ma tagata fa‘amaoni,latou te manuia ai e o‘o atu i le fa‘amasinoga a le Atua.
9. E lē matagofie le vi‘iga i le gutu o le tagata agasala,
10. auā o le Atua na puna mai ai le poto; e soa le poto ma le vi‘iga o le Atua,e faula‘i lava ia i laugutu o lē fa‘amaoni, e foa‘iina mai ‘iā te ia e le Ali‘i mamana.
11. ‘Aua ne‘i e fa‘apea ifo, “O le Atua lava ‘ua ‘ou lē maua ai le poto.”Auā o mea ‘ua ‘inosia e le Atua sa lē tatau lava ‘ona e faia.
12. ‘Aua ne‘i e fa‘apea ifo, “O ia lava ‘ua na fa‘asesē ‘iā te a‘u.”Auā e lē aogā ‘iā te ia tagata amio leaga.
13. E ‘ino‘ino le Ali‘i i mea fa‘asesē uma o le amio leaga;‘aua lava ne‘i naunau i ai o ē matata‘u ‘iā te ia.
14. Na faia le tagata e le Atua i le amataga ma ‘ua tu‘ua ia i le pule a lona loto faitalia.