1. O le mea lea ‘ua fa‘ataunu‘u mai ai e le Ali‘i lo tatou Atua lana fetalaiga ‘ua ia fetalai mai ai ‘iā i tatou ma o tatou ali‘i fa‘amasino na latou fa‘amasino ‘iā Isaraelu ma o tatou tupu ma o tatou ta‘imua ma tagata Isaraelu uma ma tagata Iuta;
2. ‘ia fa‘ao‘o mai e le Atua ‘iā i tatou o mala tetele, e pei ‘ona tusia i le tulafono a Mose, o mea e le‘i faia lava i lalo o le lagi, a ‘ua taunu‘u lava i Ierusalema;
3. ‘ia ‘ai e le tagata le ‘a‘ano o lona atali‘i ma le ‘a‘ano o lona afafine.
4. Ma ‘ua tu‘uina i tatou i le pule a tupu uma e vagavagai mai ‘iā te i tatou, ‘ia faia ma tauemuga ma mea ‘inosia i nu‘u uma ‘ua fa‘ata‘ape‘apeina ai i tatou e le Ali‘i.
5. Ma ‘ua laulalo i tatou ‘ae lē aupitoaluga auā na tatou agasala i le Ali‘i lo tatou Atua, ‘ona ‘ua tatou lē ‘ana‘ana i lona si‘ufofoga.
6. O le amiotonu o lo‘o i le Ali‘i lo tatou Atua; a o le māsiasi o mata o lo‘o ‘iā i tatou ma o tatou tamā, e pei ‘ona aliali i le aso nei,
7. auā na fetalai mai le Ali‘i ‘iā i tatou i mala uma lava ia ‘ua o‘o mai ‘iā te i tatou.
8. Ma ‘ua tatou le ‘ai‘oi atu i luma o le Ali‘i lo tatou Atua, ‘ina ‘ia ta‘ito‘atasi o i tatou ma liliu mai i ona ala matuā leaga.
9. Ma ‘ua mataala le Ali‘i ‘ia malaia i tatou ma ‘ua fa‘ao‘o mai mala ‘iā te i tatou, auā ‘ua amiotonu le Ali‘i i ana galuega uma na ia poloa‘iina mai ‘iā te i tatou;
10. ma ‘ua tatou lē fa‘alogo i lona si‘ufofoga, ‘ina ‘ia tatou sāvavali i poloa‘iga a le Ali‘i ‘ua na tu‘uina mai i o tatou luma.
11. O lenei, le Ali‘i e, le Atua o Isaraelu, o oe na e ‘aumaia o lou nu‘u mai le nu‘u o Aikupito, i le ‘a‘ao malosi, i ni fa‘ailoga ma ni vāvega ma lou mana silisili ma lou ‘a‘ao fa‘aloaloa ma ‘ua e fa‘amamaluina ai lou suafa e o‘o mai lava i le aso nei,
12. ‘ua matou agasala, ‘ua matou fai le amio leaga, ‘ua matou amioletonu, le Ali‘i e, lo matou Atua, i au fa‘amasinoga uma lava.
13. ‘Ia e liliu‘eseina lou to‘asā ‘iā te i matou, auā ‘ua tu‘ulafoa‘iina o i matou e to‘aitiiti i totonu o nu‘u ‘ese ‘ua e fa‘ata‘ape‘apeina ai i matou.
14. ‘Ia e fa‘afofoga, le Ali‘i e, ‘iā matou talosaga ma a matou ōlega ma ‘ia e lavea‘iina i matou ‘ona o oe, ‘ia e foa‘i mai ‘ina ‘ia alofagia i matou e i latou na ta‘ita‘iina i matou i le tāfeaga.
15. ‘Ina ‘ia lauiloa ai e le lalolagi uma o oe o le Ali‘i, o lo matou Atua ma ‘ua ta‘ua i lou suafa o Isaraelu ma lana lava fānau.
16. ‘Ia e silasila mai, le Ali‘i e, mai lou maota pa‘ia, ‘iā te i matou ma ‘ia e fa‘afofoga mai ma tali a matou talosaga.
17. ‘Ia silasila mai ou fofoga ma ‘ia e silafia: e lē o tagata oti o i seoli, ‘ua segi‘esea o latou agaga mai o latou tino, latou te avatua le fa‘aaloalo ma ta‘uta‘u lau amiotonu,
18. a o le agaga ‘ua fa‘anoanoa ‘ona o le tele o ona puapuagā ma ‘ua savali o punou ma le vaivai, o nenefu ona mata ma le fia ‘ai lona manava, o ia na te avatua ‘iā te oe le fa‘aaloalo ma ta‘uta‘u le amiotonu a le Ali‘i.
19. Auā e lē o le amiotonu o matou tamā ‘ua lagolago ai le fai o a matou talosaga i ou luma, po o la matou tagi atu i lou agaalofa, le Ali‘i e, lo matou Atua,
20. ‘ae ‘ona ‘ua e ‘auina mai lou to‘asā ma lou to‘atama‘i i o matou luga, e pei ‘ona e fetalai i fofoga o āu ‘au‘auna, le ‘au perofeta, o fa‘apea mai:
21. E fa‘apea ‘ona fetalai mai le Ali‘i: ‘Ia punonou o ‘outou tua ma ‘outou ua ma ‘outou faia galuega a le tupu o Papelonia, ‘ona ‘outou nonofo ai lea i le fanua na ‘ou foa‘i mai i o ‘outou tamā.
22. ‘Āfai tou te lē fa‘alogo i le si‘ufofoga o le Ali‘i lo ‘outou Atua ma fai galuega a le tupu o Papelonia, ‘ou te fa‘aaumatia ‘outou i ‘a‘ai o Iuta ma faitoto‘a o Ierusalema.
23. ‘Ou te fa‘ai‘uina ‘iā te ‘outou le leo fiafia ma le leo ‘oli‘oli, o le leo o le fa‘ato‘ā faiavā ma le leo o le fa‘ato‘ā nofotane, e leai fo‘i se tulagāvae i le lau‘ele‘ele uma o se tasi o ē sa mau ai.
24. Ma ‘ua latou lē fa‘alogo i lou si‘ufofoga, ‘ina ‘ia latou ‘au‘auna atu i le tupu o Papelonia; ma ‘ua e fa‘ataunu‘u au fetalaiga na e fetalai i fofoga o āu ‘au‘auna, o le ‘au perofeta, ‘ia ‘ave‘eseina o ivi o o matou tupu ma o matou tamā a‘i o latou tu‘ugamau;
25. fa‘auta fo‘i, ‘ua lafoia i le vevela o le lā ma le malūlū o le po; ma ‘ua oti i latou i puapuagā aupito leaga, i le oge ma le pelu ma le fa‘ama‘i oti.
26. A o le malumalu e vala‘auina i ai lou suafa, ‘ua e lafoa‘iina e pei ‘ona iloa i lenei aso, ‘ona o le amio leaga a le ‘āiga o Isaraelu ma le ‘āiga o Iuta.
27. Ma ‘ua e faia ‘iā i matou, le Ali‘i e, lo matou Atua, e tusa ma lou agalelei ‘atoa, e tusa fo‘i ma lou lava agaalofa tele lenā,
28. e pei ‘ona e fetalai mai i le fofoga o lau ‘au‘auna o Mose, i le aso na e poloa‘i mai ai ‘iā te ia e tusitusi o lau tulafono i luma o le fānau a Isaraelu,
29. o fa‘apea mai: “‘Āfai tou te lē fa‘alogo i lo‘u leo, e liua lenei nu‘u e to‘atele e fai ma lē aupito to‘aitiiti i nu‘u ‘ou te fa‘ata‘ape‘apeina ai i latou.
30. Auā ‘ua ‘ou iloa e lē fa‘alogo mai ‘iā te a‘u le nu‘u, auā o le nu‘u e ua malō; ‘ae mānatunatu ifo i latou, ta‘ito‘atasi i lona ia loto, i le nu‘u ‘ua ta‘asē ai i latou,
31. ‘ona latou iloa lea o a‘u o le Ali‘i lo latou Atua; ‘ou te foa‘i atu fo‘i ‘iā te i latou le loto, ‘ona latou lagona ai lea, o taliga, ‘ona latou fa‘alogo mai ai lea,
32. latou te vivi‘i mai ai ‘iā te a‘u i le nu‘u ‘ua latou ta‘asē ai, latou te manatua mai ai lo‘u igoa;
33. latou te tu‘ua fo‘i lo latou ua malō ma a latou amioga leaga, auā latou te manatua ala o o latou tua‘ā na latou agasala ‘iā te a‘u.
34. O a‘u fo‘i, ‘ou te toe fa‘afoisia i latou i le nu‘u na ‘ou tautō ai i o latou tamā, o Aperaamo, o Isaako ma Iakopo, latou te pule lava i ai; ‘ou te fa‘ato‘ateleina fo‘i i latou, e lē fa‘aitiitia lava.
35. ‘Ou te osia ma i latou se tasi feagaiga e fa‘avavau, ‘ia ‘avea ai a‘u ma Atua ‘iā i latou, a o i latou e fai mo‘u lava nu‘u; ‘ou te lē toe ‘ave‘esea lo‘u nu‘u, o le fānau a Isaraelu, a‘i le fanua ‘ua ‘ou foa‘iina ‘iā te i latou.” #