1. O ‘upu nei o le tusi na tusia e Paruka, le atali‘i o Neria, o le atali‘i ia o Maaseia, o le atali‘i ia o Setekaia, o le atali‘i ia o Hasataia, o le atali‘i ia o Hilikia, i Papelonia,
2. i lona lima o tausaga, i le aso fitu o le masina, i ona po na ā‘ea ai Ierusalema e Kaletaia ma ‘ua latou susunuina le ‘a‘ai i le afi,
3. ma ‘ua faitau e Paruka ‘upu o lenei tusi i luma o Iekonia, le atali‘i o Ioakima, le tupu o Iuta, i luma fo‘i o le nu‘u ‘ato‘atoa na ō mai e fa‘alogo i le tusi;
4. i luma fo‘i o aloali‘i ma alo o tupu, i luma o le ‘au toeaina ma luma o le nu‘u, o tagatanu‘u ‘atoa ma ali‘i, o i latou uma e nonofo i Papelonia, i ‘auvai o le vai tafe o le Soti.
5. ‘Ua latou fa‘alogo ma ‘ua latou fētāgisi ma anapogi ma tatalo i luma o le Ali‘i,
6. ma ‘ua latou faia se lafoga tupe, e tusa ma le mea sa mafaia e tagata ta‘ito‘atasi,
7. ma ‘ua latou ‘auina atu lea i Ierusalema, ‘iā Ioakima, le atali‘i o Hilikia, le atali‘i o Saluma, le ositaulaga ma isi ositaulaga ma le nu‘u ‘ato‘atoa sa latou nonofo fa‘atasi ma ia i Ierusalema;
8. ‘ina ‘ua maua fo‘i e ia o ipu o le malumalu o le Ali‘i, sa ‘ave‘esea i le malumalu, ‘ina ‘ia toe fa‘afo‘i atu i le fanua o Iuta, i lona sefulu o aso o le masina o Sevana: o ipu ario na faia e Setekaia, le atali‘i o Iosia, le tupu o Iuta;
9. ‘ina ‘ua ‘avea e Nepukanesa le tupu o Papelonia, o Iekonia ma ali‘i tofia ma ta‘imua uma ma tagata o le nu‘u, mai Ierusalema ma ‘ua na ta‘ita‘iina i latou i Papelonia, o saisaitia.
10. ‘Ua fa‘apea la latou ‘upu:O lenei ‘ua matou ‘auina atu ‘iā te ‘outou ni tupe, ‘ina ‘ia ‘outou fa‘atau mai ai o taulaga mū ma le mea manogi; ma ‘ia ‘outou faia ni taulaga fa‘afetai ma taulaga mo le agasala, ‘ia molia i le fatafaitaulaga o le Ali‘i lo tatou Atua;
11. ma ‘ia ‘outou tatalo mo le soifua o Nepukanesa, le tupu o Papelonia ma le soifua o Pelesara lona atali‘i, ‘ina ‘ia ‘avea o lā‘ua aso e pei o aso o le lagi i le lalolagi;
12. ‘ina ‘ia foa‘i mai e le Ali‘i le malosi ‘iā te i matou ma ‘ia fa‘amalamalama o matou mata, ‘ia matou ola i le puipuiga a Nepukanesa le tupu o Papelonia ma le puipuiga a Pelesara lona atali‘i ma ‘ia matou ‘au‘auna atu ‘iā te i lā‘ua i aso e tele ma ‘ia alofagia i matou e i lā‘ua.
13. Ma ‘ia ‘outou talosia i matou lava i le Ali‘i lo tatou Atua, auā ‘ua matou agasala i le Ali‘i lo tatou Atua ma ‘ua lē liliu‘eseina lona to‘asā ‘iā i matou e o‘o mai i lenei aso.
14. Ma ‘ia ‘outou faitauina le tusi ‘ua matou ‘auina atu ‘iā te ‘outou, ‘ia faitauina i le malumalu o le Ali‘i i aso tetele ma aso o fa‘apotopotoga.
15. Ma ‘ia ‘outou fa‘apea ane: O le amiotonu o lo‘o i le Ali‘i lo tatou Atua; a o le māsiasi o mata o lo‘o ‘iā i tatou, e pei ‘ona aliali i le aso nei mo tagata uma o Iuta ma i latou o ē nonofo i Ierusalema:
16. o tatou tupu, o tatou ta‘imua, o tatou ositaulaga ma o tatou perofeta ma o tatou tamā,
17. ‘ua tatou agasala i luma o le Ali‘i, lo tatou Atua, ‘ua tatou le fa‘atuatua, a ‘ua tatou fa‘alogogatā ‘iā te ia.
18. Ma ‘ua tatou lē ‘ana‘ana ‘iā te ia, ‘ua tatou lē fa‘alogo i le si‘ufofoga o le Ali‘i, lo tatou Atua, ‘ia tatou sāvavali i ana poloa‘iga na ia tu‘u mai ‘iā te i tatou.
19. E āfua mai i le aso na ia ‘aumaia o tatou tamā a‘i Aikupito, e o‘o mai i le aso lenei, na tatou fa‘alogogatā i le Ali‘i, lo tatou Atua; ma ‘ua tatou fa‘amamao atili pea ‘ina ne‘i fa‘alogo i lona si‘ufofoga.
20. Ma ‘ua pesia ai i tatou i ni mea leaga e tele, e pei ‘ona iloa i aso nei, ‘atoa ma malaia uma na ta‘utino mai e le Atua ‘iā Mose, lana ‘au‘auna, ‘ua na ‘aumaia o tatou tamā a‘i Aikupito, e foa‘i mai ‘iā te i tatou le fanua e tafe mai ai le suāsusu ma le meli.
21. Ma ‘ua tatou lē ‘ana‘ana i le si‘ufofoga o le Ali‘i, lo tatou Atua, e tusa ma ‘upu uma a perofeta na ia ‘auina mai ‘iā te i tatou;
22. ma ‘ua tatou sāvavali ta‘itasi i manatu o lona loto leaga, o ‘au‘auna atu i atua ‘ese ma fai le leaga i luma o le Ali‘i, lo tatou Atua. #