23. o povi fo‘i e lua, o mamoe po‘a e lima, o ‘oti po‘a e lima, ma tama‘i mamoe e lima e tasi lo latou tausaga, e fai ma taulaga fa‘afetai; o le taulaga lea a Natanielu le atali‘i o Suaro.
24. O le tolu o aso na fai taulaga ai le ali‘i sili o le fānauga a Sepulona, o Eliapo lea o le atali‘i o Holona;
25. o lana taulaga o le tanoa ario e tasi, o lona mamafa e tasi le selau ma le tolugafulu o sekeli, o le ipu ario e tasi, e fitugafulu o sekeli lona mamafa, o le sekeli lea o le malumalu; ‘ua tūtūmu ia mea e lua i le falaoa lelei ‘ua palua ma le u‘u e fai ma taulaga i mea e ‘ai;
26. o le ipu auro e tasi, e sefulu o sekeli lona mamafa, ‘ua tumu i mea manogi e mū;
27. o le povi po‘a ta‘anoa e tasi, o le mamoe po‘a e tasi, ma le tama‘i mamoe e tasi ‘ua tasi lona tausaga, e fai ma taulaga mū;