4. O tuāfanua fo‘i e si‘osi‘o ai ia ‘a‘ai tou te tu‘uina atu i sa Levī, e amata atu i le pā o le ‘a‘ai, e o‘o i le mea e gata mai ai le afe o kupita.
5. Tou te fuafua e amata atu i tua o le ‘a‘ai i le itū i sasa‘e e lua afe o kupita, ma le itū i saute e lua afe o kupita, o le itū fo‘i i sisifo e lua afe o kupita, ma le itū i matū e lua afe o kupita; ‘ae tuloto le ‘a‘ai; o tuāfanua ia o ‘a‘ai mo i latou.
6. O ‘a‘ai fo‘i tou te tu‘uina atu i sa Levī ia i ai ‘a‘ai e ono e fai ma sulufa‘iga, tou te tu‘uina atu ai e sola i ai lē na te fasioti se tasi; tou te fa‘aopoopoina fo‘i i ai o ‘a‘ai e fagafulu ma le lua.
7. O ‘a‘ai uma tou te tu‘uina atu i sa Levī e fagafulu ma le valu ia; o i latou ma o latou tuāfanua.
8. O ‘a‘ai fo‘i tou te tu‘uina atu mai ‘a‘ai o le fānauga a Isaraelu; o ē ‘ua i ai ‘a‘ai e tele tou te vāea mai ia tele, a o ē ‘ua itiiti o latou ‘a‘ai, tou te vāea mai ‘ia itiiti; e ta‘ito‘atasi ma avatu ni ona ‘a‘ai i sa Levī, ‘ia fa‘atatau ma lona tofi ‘ua maua.
9. ‘Ua fetalai mai fo‘i le ALI‘I ‘iā Mose, ‘ua fa‘apea mai:
10. ‘Ia e fai atu i le fānauga a Isaraelu, ‘ia fa‘apea atu ‘iā te i latou, Pe a ‘outou sopo‘ia atu Ioritana i le nu‘u o Kanana,
11. ‘ona tofia lea e ‘outou o ‘a‘ai e fai ma ‘a‘ai o sulufa‘iga ‘iā te ‘outou; ‘ina ‘ia sola i ai o lē fasioti tagata o lē ‘ua pa‘ivalea ai se tasi ‘iā te ia.
12. E fai fo‘i ia ‘a‘ai ma sulufa‘iga ‘iā te ‘outou a‘i lē na te taui ma sui, ‘ina ne‘i oti le fasioti tagata; se‘ia tu mai o ia i luma o le fa‘apotopotoga e fa‘amasinoina ai.
13. O ‘a‘ai fo‘i ia tou te tu‘uina atu, e ono ‘a‘ai e fai ma sulufa‘iga mo ‘outou.
14. Tou te tu‘uina atu ‘a‘ai e tolu i lenei itū o Ioritana, tou te tu‘uina atu fo‘i o ‘a‘ai e tolu i le nu‘u o Kanana, e fai lava ma ‘a‘ai o sulufa‘iga.
15. O ia ‘a‘ai e ono e fai ma sulufa‘iga mo le fānauga a Isaraelu, ma le tagata ‘ese, ‘atoa ma lē ‘ua āumau ‘iā te i latou, ‘ina ‘ia ta‘itasi ma sola atu i ai o lē ‘ua pa‘ivalea se tasi ‘iā te ia.
16. ‘Ae ‘āfai e fasia se tasi e le tasi i se u‘amea e oti ai lava o ia, o le fasioti tagata lava lea; ‘ia matuā fasiotia lava le fasioti tagata.
17. ‘Āfai fo‘i ‘ua lavea se tasi e le tasi i le ma‘a ‘ua togi e mafai ‘ona oti ai o ia, e oti ai fo‘i o ia, o le fasioti tagata lava lea; ‘ia matuā fasiotia lava le fasioti tagata.
18. Po ‘ua lavea se tasi e le tasi i se la‘au i lona lima e mafai ‘ona oti ai o ia, e oti ai fo‘i o ia, o le fasioti tagata lava lea; e matuā fasiotia lava le fasioti tagata.
19. O lē na te tauia ma sui le toto, o ia lava na te fasioti i le fasioti tagata; pe a la fetaia‘i ma ia na te fasioti ‘iā te ia.