46. Na latou ō mai mai Tipona-kato, ma latou tolauapi i Alemoni-tipelata.
47. Na latou ō mai mai Alemoni-tipelata, ma latou tolauapi i mauga o Aperima, e feagai ma Nepo.
48. Na latou ō mai mai mauga o Aperima, ma latou tolauapi i le ‘ele‘ele laugatasi o Moapi, e latalata ane i Ioritana e fesagai ma Ieriko.
49. Na tolauapi i latou e latalata ane i Ioritana, pau mai i Petesemota, pau mai i Apelasetima, i le ‘ele‘ele laugatasi o Moapi.
50. ‘Ona fetalai mai lea o le ALI‘I ‘iā Mose i le ‘ele‘ele laugatasi o Moapi, e latalata ane i Ioritana, e fesagai ma Ieriko, ‘ua fa‘apea mai:
51. ‘Ia e fai atu i le fānauga a Isaraelu, ‘ia fa‘apea atu ‘iā te i latou, A ‘outou o‘o atu i lelā itū o Ioritana i le nu‘u o Kanana,
52. ‘ona ‘outou tulia ai lea o ē o nonofo i le nu‘u uma lava a‘i o ‘outou luma, ‘ia ‘outou fa‘aumatia a latou fa‘atagata uma lava, ‘ia fa‘aumatia fo‘i e ‘outou a latou tupua u‘amea lava; o a latou mea maualuluga uma lava tou te matuā fa‘aumatia.
53. ‘Ia tulia e ‘outou le nu‘u, ma ‘outou nonofo ai; auā ‘ua ‘ou tu‘uina atu le nu‘u ‘iā te ‘outou e fai mo ‘outou tofi.
54. Tou te tofitofi le nu‘u i le vili e fai ma tofi i o ‘outou ‘āiga; o ē to‘atele ‘ia ‘outou avatu i ai le tofi ‘ia tele; a o ē to‘aitiiti, ‘ia ‘outou avatu i ai le tofi ‘ia itiiti; o le mea e fa‘asaga i ai le vili a le tagata e fai lea mōna, e maua o ‘outou tofi i itū‘āiga o ‘outou tamā.
55. ‘Ae ‘āfai tou te lē tulia i o ‘outou luma o ē o nonofo i le nu‘u, ‘ona ‘avea lea o i latou o ē ‘ua ‘outou fa‘atotoeina, ma mea matuitui i o ‘outou mata, ma la‘au talatala i o ‘outou itū, ma latou fa‘atigā ‘iā te ‘outou i le nu‘u tou te nonofo ai.