34. o Iuta, ma Peniamina, ma Semaia, ma Ieremia.
35. O isi atali‘i fo‘i o ositaulaga ‘ua i ai pū; o Sakaria le atali‘i o Ionatana, o le atali‘i ia o Semaia, o le atali‘i ia o Matania, o le atali‘i ia o Mekaia, o le atali‘i ia o Sakura, o le atali‘i ia o Asafo;
36. ma ona uso, o Semaia, ma Asareelu, o Melali, o Kilali, o Maai, o Natanielu, ma Iuta, ma Hanani, ‘ua i ai la‘aupese a Tavita le tagata o le Atua, ma Esera le tusi‘upu i o latou luma.
37. O le faitoto‘a fo‘i o le vaipuna, sa i o latou luma, na latou ō a‘e ai i le ala fa‘a‘apefa‘i o le ‘a‘ai o Tavita, i le alu a‘e o le pā i luga o le fale o Tavita, e o‘o atu lava i le faitoto‘a o le vai i sasa‘e.
38. O lona lua fo‘i o vasega o ē na fa‘afetai ‘ua latou sāvavali i le tasi itū, ‘ua ‘ou mulimuli atu fo‘i ‘iā te i latou, ma le tasi vaega o le nu‘u i luga o le pā, e āfua i ona tala atu o le ‘olo o ‘ogāumu e o‘o atu i le pā lautele;
39. mai luga fo‘i o le faitoto‘a o Efaraima, ma luga o le faitoto‘a tuai, ma luga o le faitoto‘a o i‘a, ma le ‘olo o Hananiali, ma le ‘olo o Meaa, e o‘o lava i le faitoto‘a o mamoe; ma ‘ua latou tutū i le faitoto‘a o le fale puipui.
40. ‘Ona tutū ai lea o vasega e lua o ē fa‘afetai i le fale o le Atua, o a‘u fo‘i, ma le tasi vaega o faipule fa‘atasi ma a‘u;
41. ma ositaulaga; o Eliakimo, o Maaseia, o Meneamina, o Mekaia, o Elioenai, o Sakaria, ma Hanania, ‘ua i ai pū;
42. ma Maaseia, ma Semaia, ma Eleasara, ma Usi, ma Ioanana, ma Malekia, ma Elama, ma Esera. ‘Ua pepese fo‘i ma le leo tele o ē pepese, ma Isaraia lo latou matai.
43. ‘Ua latou osia fo‘i i lea aso o taulaga e tele, ma ‘ua latou fiafia; auā ‘ua fa‘afiafia le Atua ‘iā te i latou i le fiafia tele; o fafine fo‘i ma tama na latou fiafia; ‘ua lagona fo‘i le fiafia o Ierusalema i mea e mamao atu.
44. Sa tofia fo‘i i lea aso nisi e pule i potu e tu‘u ai ‘oloa, ma taulaga ma mea fa‘apolopolo, ma mea e sefulua‘i mea, e fa‘apotopoto i ai mai fanua o ‘a‘ai o mea e tusa ma le tulafono ma ositaulaga ma sa Levī; auā na fiafia Iuta ‘ona o ositaulaga ma sa Levī o ē na tutū mai.
45. O ē pepese fo‘i ‘atoa ma leoleo faitoto‘a, na latou tausiusi i le tofiga a lo latou Atua, ma le tofiga o le fa‘amamāina, e tusa ma le poloa‘iga a Tavita, ma Solomona lona atali‘i.