1. ‘Ua fetalai mai le ALI‘I ‘iā Iosua, “‘Aua ‘e te fefe, ‘aua ‘e te mata‘u, tou te ō ma ‘au uma o le tau‘a, ‘ia tula‘i ma alu a‘e i Ai; fa‘auta, ‘ua ‘ou tu‘uina i ou lima le tupu o Ai, ma ona tagata, ma lana ‘a‘ai, ma lona lau‘ele‘ele.
2. ‘E te faia fo‘i i Ai ma lona tupu, e pei ‘ona e faia, i Ieriko ma lona tupu, a o le vete, ma manu ‘ua i ai, tou te fai ma a ‘outou vete. ‘Ia e tofia ni ‘au e tanu i tua o le ‘a‘ai.”
3. ‘Ona tula‘i ai lea o Iosua, ‘atoa ma ‘au uma o le tau‘a, e ō a‘e i Ai; na filifilia fo‘i e Iosua o toa malolosi e tolu sefulu o afe, ma ‘a‘auina atu i latou i le po.
4. ‘Ua ia fai atu fo‘i ‘iā te i latou, ‘ua fa‘apea atu, “Fa‘auta mai ‘ea, ‘ia tanu ‘outou e latalata i le ‘a‘ai, i tua o le ‘a‘ai; ‘aua ne‘i mamao lava ‘outou ma le ‘a‘ai, a ‘ia nofo sauni ‘outou uma lava;
5. o a‘u fo‘i ma le nu‘u uma o ‘iā te a‘u, matou te fa‘alatalata atu i le ‘a‘ai; a latou ō mai e fa‘afetaia‘i ‘iā te i matou, e pei o le ulua‘i tau‘a, ‘ona fa‘atulitulia ai lea o i matou i o latou luma;
6. (auā latou te ō mai ‘iā te i matou,) se‘ia matou tōsina i latou ai le ‘a‘ai; auā e fa‘apea ane i latou, ‘‘Ua latou sōsōla i o tatou luma, e pei o le ulua‘i tau‘a;’ o le mea lea matou te sōsōla ai i o latou luma.
7. ‘Ona ‘outou tula‘i ai lea i le mea ‘ua tanu ai, ma ‘outou ā‘ea le ‘a‘ai; auā e tu‘uina mai e le ALI‘I lo ‘outou Atua i o ‘outou lima.
8. A ‘outou maua le ‘a‘ai, ‘ona susunuina lea e ‘outou o le ‘a‘ai i le afi; ‘ia ‘outou faia e pei o le afioga a le ALI‘I; fa‘auta, ‘ua ‘ou fai atu ‘iā te ‘outou.”
9. ‘Ua ‘a‘auina atu i latou e Iosua; ‘ona latou ō ai lea e tanu ‘iā latou ‘au; ‘ua latou nonofo i le vā o Peteli ma Ai, i gagaifo o Ai; a o Iosua, na moe ia i lea po fa‘atasi ma le nu‘u.
10. ‘Ua tula‘i Iosua i le taeao lava, na faitaulia e ia le nu‘u; ‘ona ō a‘e lea i Ai, o ia ma toeaina o Isaraelu, ‘ua muamua i luma o le nu‘u.
11. ‘Ua ō a‘e fo‘i ‘au uma o le tau‘a na ‘iā te ia, ‘ua latou fa‘alatalata atu, ‘ua o‘o lava i luma o le ‘a‘ai, ‘ona latou tolauapi lea i le itū i matū o Ai; a o le vanu e vā a‘i o ia ma Ai.
12. A ‘ua uma ‘ona ‘ave e ia o tagata pe lima afe, ma tofia i latou e lalafi i le vā o Peteli ma Ai, i gagaifo o le ‘a‘ai.