19. E tanumia o ia e pei ‘ona tanua o le asini;e tōsina ma tia‘iina i tua o faitoto‘a o Ierusalema.
20. ‘Inā alu a‘e ia i Lepanona ma ‘alaga,‘ia e leo tele i Vasana,‘ia e ‘alaga fo‘i mai Aperima;auā ‘ua fa‘aumatia o i latou uma sa manana‘o ‘iā te oe.
21. Na a‘u fai atu ‘iā te oe ‘ina o ē manuia;a ‘ua e fai mai, “‘Ou te lē fa‘alogo atu.”O lau masani lea talu ‘ina e itiiti,‘ua e lē fa‘alogo i lo‘u leo.
22. E fagaina au leoleo mamoe uma i le matagi;e ō i le tāfeaga o ē manana‘o ‘iā te oe;‘ona e mā ai lava lea ma māsiasi ‘ona o au amio leaga uma.
23. O oe na lē mau i Lepanona,ma fai lou ōfaga i arasi,talofa lava ‘iā te oe pe a o‘o ‘iā te oe le fa‘atigā,o le tigā e pei o le fafine a fānau mai.
24. O lo‘o fetalai mai le ALI‘I: O lo‘o ola a‘u, pe ‘āfai ana fai Konia le atali‘i o Ioakima le tupu o Iuta ma fa‘amaufa‘ailoga i lo‘u lima taumatau; a ‘ou te se‘i‘esea oe a‘i lea mea.
25. ‘Ou te tu‘uina atu fo‘i oe i lima o ē sā‘ili ‘iā te oe ‘ia oti ma lima o i latou ‘ua e mata‘u i ai, o le lima fo‘i o Nepukanesa le tupu o Papelonia ma lima o tagata o Kaletaia.
26. ‘Ou te tutuli ‘iā te ‘oulua ma lou tinā na fānaua oe e ō i le nu‘u ‘ese na lē fānanau ai ‘oulua; e oti fo‘i ‘oulua i lea mea.
27. A o le nu‘u ‘ua naunau o latou loto e toe fo‘i mai i ai, latou te lē toe fo‘i mai lava i ai.
28. O le ipu ‘inosia ‘ea ma le ta‘eia lenei tagata o Konia? O le ipu ‘ea o ia ‘ua lē fiafia i ai? Se a le mea ‘ua tulia ai i latou e ia ma lana fānau ma ‘ua lafoa‘iina i latou i le nu‘u na latou lē iloa?
29. Le lalolagi e, le lalolagi e, le lalolagi e,‘inā fa‘alogologo mai ia i le afioga a le ALI‘I.
30. O lo‘o fa‘apea ‘ona fetalai mai o le ALI‘I:‘Ia ‘outou tusia lenei tagata e āufānaua,o le tagata e le manuia i lona olaga.Auā e le manuia se tasi o lana fānau,e le ti‘eti‘e i le nofoāli‘i o Tavita pe toe pule i Iuta.