14. ‘Ua fa‘apea ane o ia,“‘Ou te faia mo a‘u le fale tele ma potualuga e tetele;”‘ua faia fo‘i fa‘amalama mo ia ma ‘ua tapapa i arasi ma vali i le vali mūmū.
15. E fai ‘ea oe ma tupu ‘ina ‘ua e finau e fai fale arasi?O lou tamā na lē ‘ai ‘ea o ia ma inu ma faia le fa‘amasinoga ma le amiotonu?‘ona manuia ai lea o ia.
16. Na fa‘atonuina e ia le finauga o ē ‘ua puapuagāina ma ē ‘ua matitiva;‘ona manuia ai lea o ia.E lē o le iloa ‘ea o a‘u lenā?o lo‘o fetalai mai ai le ALI‘I.
17. A ‘ua na ‘ona fa‘asaga o ou mata ma lou loto i lau ‘oloama le fa‘amaligiina o le toto o le ‘ua lē sala,ma lē fa‘asauā ma le fa‘atigāina, ‘ia faia.
18. O le mea lea o lo‘o fa‘apea ‘ona fetalai mai ai o le ALI‘I i mea a o‘o ‘iā Ioakima le atali‘i o Iosia, le tupu o Iuta:Latou te lē taufaitagitu‘i ‘iā te ia,e fa‘apea, “Auē! lo‘u uso e.” “Auē! le tuafafine e.”Latou te lē taufaitagitu‘i ‘iā te ia e fa‘apea,“Auē! le ali‘i e.”“Auē! le mamalu e.”
19. E tanumia o ia e pei ‘ona tanua o le asini;e tōsina ma tia‘iina i tua o faitoto‘a o Ierusalema.
20. ‘Inā alu a‘e ia i Lepanona ma ‘alaga,‘ia e leo tele i Vasana,‘ia e ‘alaga fo‘i mai Aperima;auā ‘ua fa‘aumatia o i latou uma sa manana‘o ‘iā te oe.
21. Na a‘u fai atu ‘iā te oe ‘ina o ē manuia;a ‘ua e fai mai, “‘Ou te lē fa‘alogo atu.”O lau masani lea talu ‘ina e itiiti,‘ua e lē fa‘alogo i lo‘u leo.
22. E fagaina au leoleo mamoe uma i le matagi;e ō i le tāfeaga o ē manana‘o ‘iā te oe;‘ona e mā ai lava lea ma māsiasi ‘ona o au amio leaga uma.
23. O oe na lē mau i Lepanona,ma fai lou ōfaga i arasi,talofa lava ‘iā te oe pe a o‘o ‘iā te oe le fa‘atigā,o le tigā e pei o le fafine a fānau mai.
24. O lo‘o fetalai mai le ALI‘I: O lo‘o ola a‘u, pe ‘āfai ana fai Konia le atali‘i o Ioakima le tupu o Iuta ma fa‘amaufa‘ailoga i lo‘u lima taumatau; a ‘ou te se‘i‘esea oe a‘i lea mea.
25. ‘Ou te tu‘uina atu fo‘i oe i lima o ē sā‘ili ‘iā te oe ‘ia oti ma lima o i latou ‘ua e mata‘u i ai, o le lima fo‘i o Nepukanesa le tupu o Papelonia ma lima o tagata o Kaletaia.
26. ‘Ou te tutuli ‘iā te ‘oulua ma lou tinā na fānaua oe e ō i le nu‘u ‘ese na lē fānanau ai ‘oulua; e oti fo‘i ‘oulua i lea mea.
27. A o le nu‘u ‘ua naunau o latou loto e toe fo‘i mai i ai, latou te lē toe fo‘i mai lava i ai.