4. e oti i latou i ma‘i e oti ai; e leai ni e taufaitagitu‘i ‘iā te i latou; e le tanumia fo‘i i latou; e ‘avea i latou ma otaota i luga o le lau‘ele‘ele; e fa‘aumatia i latou i le pelu ma le oge, e fai fo‘i o latou tino ‘ua oti ma mea e ‘ai mā manu felelei ma manu e tata‘a.
5. Auā ‘ua fa‘apea ‘ona fetalai mai o le ALI‘I: ‘Aua ‘e te ulufale i le fale o i ai le auega, ‘aua fo‘i ‘e te alu e tagitu‘i ai, ‘aua fo‘i ‘e te fa‘anoanoa ‘iā te i latou; auā ‘ua ‘ou ‘ave‘eseina lo‘u manuia i lenei nu‘u, o le alofa lava, ma le alofa mutimutivale, o lo‘o fetalai mai ai le ALI‘I.
6. E oti ali‘i ‘atoa ma tagata nu‘u i lenei nu‘u; e le tanumia i latou, e le taufaitagitu‘i nisi ‘ona o i latou, e le selei fo‘i o latou tino, e le sele mamā fo‘i o latou ulu ‘ona o i latou.
7. E le tofitofia mea e ‘ai o le fa‘anoanoa ‘ona o i latou e fai ma fa‘amafanafana ‘iā te i latou ‘ona o lē ‘ua oti; latou te lē avatu ‘iā te i latou le ipu o le fa‘amafanafanaga latou te inu ai ‘ona o latou tamā, po o latou tinā.
8. ‘E te lē ulufale fo‘i i le fale e fai ai le tausamiga, e lē nonofo ma i latou e ‘ai ai ma inu ai.
9. Auā ‘ua fa‘apea ‘ona fetalai mai o le ALI‘I o ‘au, le Atua o Isaraelu, Fa‘auta, ‘ou te fa‘ai‘uina le leo fiafia ma le leo ‘oli‘oli, o le leo o le fa‘ato‘āfaiavā ma le leo o le fa‘ato‘ānofotane a‘i lenei mea i o ‘outou luma, a o ola mai ‘outou.
10. A uma ‘ona e fa‘aali atu i lenei nu‘u ia ‘upu uma ma latou fai mai ‘iā te oe, “Se a le mea ‘ua fai mai ai le ALI‘I ‘iā te i matou lenei malaia uma e tele? pe se a ‘ea sa matou amioletonu? pe se a fo‘i sa matou agasala ‘ua matou agasala atu ai i le ALI‘I lo matou Atua?”
11. ‘Ona e fa‘apea atu ai lea ‘iā te i latou, Auā ‘ua lafoa‘iina a‘u e o ‘outou tamā, o lo‘o fai mai ai le ALI‘I, a ‘ua latou mulimuli atu i atua ‘ese ma ‘au‘auna i ai, ma ifo atu ‘iā te i latou, a ‘ua lafoa‘iina a‘u ma ‘ua lē ‘ana‘ana i latou i la‘u tulafono.
12. A o ‘outou, ‘ua faia e ‘outou amio leaga e sili i o ‘outou tamā; fa‘auta fo‘i, ‘ua ta‘itasi le tagata ma savali i le finau vale o lona loto leaga, ‘ua lē fa‘alogo mai ‘iā te a‘u.
13. O lea ‘ou te tutuli ai ‘iā te ‘outou a‘i lenei nu‘u i le nu‘u ‘ua ‘outou lē iloa; o ‘outou po o ‘outou tamā; tou te ‘au‘auna fo‘i i lea mea i atua ‘ese i le ao ma le po; auā ‘ou te lē alofa ‘iā te ‘outou.
14. ‘Ae ui i lea fa‘auta, e o‘o mai ai ona po, o lo‘o fetalai mai ai le ALI‘I, e lē toe fai ane ai tagata, “O lo‘o soifua le ALI‘I, o lē na ‘aveina a‘e le fānauga a Isaraelu nai le nu‘u o Aikupito;”
15. ‘ae “fa‘apea, o lo‘o soifua ALI‘I, o lē na ‘aveina a‘e le fānauga a Isaraelu nai le nu‘u i le itū i matū ma nu‘u uma na ia tulia ai i latou.” Auā ‘ou te fa‘afoisia mai i latou i lo latou lau‘ele‘ele, na a‘u foa‘iina atu ai i o latou tamā.
16. Fa‘auta, ‘ou te ‘a‘auina atu tagata fai faiva e to‘atele, o lo‘o fetalai mai ai le ALI‘I, latou te fai faiva ‘iā te i latou; e mulimuli ane ‘ou te ‘a‘auina atu tagata tuli manu e to‘atele, latou te tutuli ‘iā te i latou mai atu mauga uma ma mauga uma ma māvaevae o papa.