1. ‘Ua fa‘apea ‘ona fetalai mai o le ALI‘I ‘iā te a‘u, “Alu ia, ‘ia e fai mo oe le fusi lino ma fusi a‘i lou sulugātiti, ‘aua fo‘i ‘e te tu‘u i le vai.”
2. ‘Ona ‘ou maua lea o le fusi e tusa ma le afioga a le ALI‘I ma ‘ou fusi a‘i lo‘u sulugātiti.
3. ‘Ona fo‘i fa‘alua mai ai lea o le afioga a le ALI‘I ‘iā te a‘u, ‘ua fa‘apea mai,
4. “‘Ia e ‘ave le fusi ‘ua e maua o i ai i lou sulugātiti ma e tula‘i ma alu i Eufirate ma nanā ai i lea mea i se mea māvae o le papa.”
5. ‘Ona ‘ou alu ai lea ma nanā ai i Eufirate, e pei ‘ona fetalai mai ai o le ALI‘I ‘iā te a‘u.
6. ‘Ua mavae aso e tele, ‘ona fa‘apea mai ai lea o le ALI‘I ‘iā te a‘u, “‘Inā tula‘i ia, alu i Eufirate ma ‘aumai ai le fusi na ‘ou fai atu ai ‘iā te oe e nanā i lea mea.”
7. ‘Ona a‘u alu ai lea i Eufirate ma a‘u ‘eli ma ‘ava‘e nai lea mea le fusi na ‘ou nanā ai; fa‘auta fo‘i, ‘ua leaga le fusi, ‘ua lē aogā i se mea e tasi.
8. ‘Ona tulei mai lea o le afioga a le ALI‘I ‘iā te a‘u, ‘ua fa‘apea mai:
9. ‘Ua fa‘apea ‘ona fetalai mai o le ALI‘I, E fa‘apenā ‘ona ‘ou fa‘aleagaina le fa‘amaualuga o Iuta ma le fa‘amaualuga tele o Ierusalema.
10. O lenei nu‘u amio leaga, ‘ua lē mafafai i latou ‘ona fa‘alogo mai i a‘u ‘upu, ‘ua sāvavali ma le loto finau vale ma mulimuli atu i atua ‘ese, e ‘au‘auna ma ifo ‘iā te i latou, e ‘avea lava i latou e pei o lenei fusi, e lē aogā i se mea e tasi.
11. Auā e pei ‘ona pipi‘i le fusi i le sulugātiti o le tagata, sa fa‘apea ‘ona a‘u fa‘apipi‘i ‘iā te a‘u o le ‘āiga uma o Isaraelu ma le ‘āiga uma o Iuta, o lo‘o fetalai mai ai le ALI‘I; ‘ina ‘ia fai i latou mo‘u nu‘u, ‘ia fai fo‘i ma igoa ma vi‘iga ma matagofie; a ‘ua latou lē fa‘alogo mai.
12. O le ‘upu fo‘i lenei ‘e te fai atu ai ‘iā te i latou, O lo‘o fa‘apea ‘ona fetalai mai o le ALI‘I le Atua o Isaraelu: E fa‘atūtūmuina fagu uma i le uaina; latou te fai mai fo‘i ‘iā te oe, “E lē ‘ua matou matuā iloa ‘ea e fa‘atūtūmuina fagu uma i le uaina?”
13. ‘Ona e fai atu lea ‘iā te i latou, o lo‘o fa‘apea ‘ona fetalai mai o le ALI‘I: Fa‘auta, ‘ou te fa‘atūtūmuina i le ‘onā o i latou uma o ē nonofo i lenei nu‘u, o tupu o ē nonofo i le nofoāli‘i o Tavita, ‘atoa ma ositaulaga ma perofeta ma i latou uma o ē nonofo i Ierusalema.