6. Auā mai ‘iā Isaraelu lava ia; na faia o ia e le tufuga; e lē o le Atua lava ia, o le mea lea e nutilili‘iina ai le tama‘i povi o Samaria.
7. Na latou lūlūina le matagi, o le mea lea latou te selesele mai ai le afā; ‘ua leai sona tino; e le tupu se saito i le fuga, ‘ae ‘āfai e fua, e ‘aina e tagata ‘ese.
8. ‘Ua fa‘aumatia Isaraelu; latou te i ai nei i nu‘u ‘ese, e pei o se ipu e leai se fiafia i ai.
9. Auā ‘ua latou ō a‘e i Asuria, ‘ua se asini o le vao ‘ua nofo to‘atasi; ‘ua fa‘a‘oloaina e Efaraima o ē manana‘o ‘iā te ia.
10. ‘Ae ui ‘ina latou fa‘a‘oloaina nu‘u ‘ese, ‘ou te fa‘apotopoto nei ‘iā te i latou; e le pine ‘ona tigā o i latou ‘ona o le avega mai le tupu o ali‘i.
11. ‘Ua faia e Efaraima fatafaitaulaga e tele, e agasala ai; o le mea lea na ‘avea ai fatafaitaulaga ma mea e agasala ai o ia.
12. ‘Ua ‘ou tusi atu ‘iā te ia o mea tetele i la‘u tulafono; a ‘ua ta‘ua ia mea o mea ‘ese.
13. Latou te fai taulaga i manu e fai ma taulaga mo a‘u ma latou ‘a‘ai ai; a ‘ua lē talia i latou e le ALI‘I; e manatua nei e ia a latou amio leaga ma taui ‘iā latou agasala; latou te toe fo‘i i Aikupito.
14. Auā ‘ua fa‘agalogalo e Isaraelu i Lē na faia o ia, ‘ua fa‘atūina e ia o malumalu; o Iuta fo‘i ‘ua ia fa‘ateleina o ‘a‘ai nofo ‘olo; ‘ou te tu‘uina atu le afi i ana ‘a‘ai, e fa‘aumatia ai ona maota.#