1. ‘Ua mavae le oti o Iosua, ona fesili ai lea o le fānauga a Isaraelu i le ALI‘I, ‘ua fa‘apea atu, “Po o ai e muamua ‘ona alu a‘e i sa Kanana mo i matou, e tau ma i latou?”
2. ‘Ua fetalai mai le ALI‘I, “E alu a‘e Iuta fa‘auta, ‘ua ‘ou tu‘uina atu le nu‘u i lona lima.”
3. ‘Ona fai atu ai lea o Iuta ‘iā Simeona lona uso, “‘Ia tā ō a‘e ma a‘u i lo‘u tofi, ‘ina ‘ia tatou tau ma sa Kananā; o a‘u fo‘i, tā te ō a‘e ma oe i lou tofi.” ‘Ona la ō a‘e ai lea ma Simeona.
4. ‘Ua alu a‘e fo‘i Iuta, ‘ona tu‘uina atu ai lea e le ALI‘I o sa Kananā ma sa Perisē i o latou lima; ‘ua latou fasia fo‘i latou i Piseka e sefulu afe o tagata.
5. ‘Ua latou maua fo‘i Atonipiseka i Piseka; ‘ona latou tau ai lea ma ia; ‘ua latou fasia fo‘i sa Kanana ma sa Perisē.
6. A ‘ua sola Atonipiseka; na latou tuliloa ‘iā te ia, ‘ua maua, ‘ona latou tipi‘esea ai lea ona lima matua ma ona vae matua.
7. ‘Ona fai ane ai lea o Atonipiseka, “E to‘afitugafulu tupu na tipi‘eseina, o latou lima matua ma o latou vae matua, na latou samusamu i lalo o la‘u la‘o‘ai; e pei ‘ona ‘ou faia, e fa‘apea lava ‘ona tauia mai a‘u e le Atua.” ‘Ua latou ‘avea o ia i Ierusalema, ‘ona oti lea o ia i lea mea.
8. ‘Ua si‘i fo‘i le tau‘a o le fānauga a Iuta i Ierusalema, ma ‘ua latou ā‘ea, ‘ua latou fasia ai i le pelu, ma latou susunuina le ‘a‘ai i le afi.
9. E mulimuli ane fo‘i ‘ua ō ifo le fānauga a Iuta e tau ai le tau‘a ma sa Kanana, o ē sa nonofo i le atu mauga, ma le itū i saute, ma le nu‘u maulalo.
10. ‘Ua alu fo‘i Iuta e tau ma sa Kanana, o ē sa nonofo i Heperona; (o Kiriata-arapa, o le igoa lea anamua o Heperona;) ‘ua latou fasia fo‘i o Sesai, ma Aimano, ma Talemai.
11. ‘Ona alu atu lea o latou ai lea mea e tau ma ē sa nonofo i Tiperi; (o Kiriata-sapera, o le igoa lea anamua o Tiperi.)
12. ‘Ona fai atu lea o Kalepo, “O sē na te fasia Kiriata-sapera, ma ā‘ea ai, ‘ou te avatu ‘iā te ia o Akesa lo‘u afafine e fai māna avā.”
13. ‘Ona ā‘ea ai lea e Otinielu le atali‘i o Kinasa, o le uso itiiti lea o Kalepo; ‘ona avatu ai lea e ia o Akesa lona afafine ‘iā te ia e fai māna avā.
14. ‘Ua alu atu ia, ‘ona fa‘aoso ai lea o ia ‘iā te ia, na te ole atu i se fanua mai lona tamā; ‘ua alu ifo ia nai le asini, ‘ona fai mai ai lea o Kalepo ‘iā te ia, “Se a ‘ea lou mana‘o?”
15. ‘Ona fai atu lea o ia ‘iā te ia, “‘Ia e alofa mai ‘iā te a‘u; auā na e avane ‘iā te a‘u le fanua i le itū i saute; ‘ia e foa‘i mai fo‘i ma ni vaipuna.” ‘Ona avatu ai lea o Kalepo ‘iā te ia o vaipuna o i luga ‘atoa ma vaipuna o i lalo.
16. O le fānau a le sa Kenī, o le tamā lea o le avā a Mose, ‘ua latou ō a‘e nai le ‘a‘ai o pama fa‘atasi ma le fānauga a Iuta, i le vao o Iuta i lona itū i saute o Arata; ‘ua latou o fo‘i ma nonofo fa‘atasi ma le nu‘u.