2. ‘Ona tō ‘ese ai lea e le tupu o lana mama ‘ua ia ‘ave‘eseina ia Hamanu, ma na tu‘uina atu ai ‘iā Moretekai. ‘Ua tofia fo‘i Moretekai e Eseta e pule i le fale o Hamanu.
3. ‘Ona toe tautala atu lea o Eseta i le tupu, ‘ua ia fa‘apa‘ū fo‘i i luma o ona vae ma tagi, ma ‘ai‘oi ‘iā te ia, ‘ia fa‘aliliu‘eseina e ia le leaga a Hamanu o lo sa Akakō, ma lana manatu na ia manatu ai i sa Iutā.
4. ‘Ona fa‘aloaloa mai lea e le tupu o le to‘oto‘o auro ‘iā Eseta. ‘Ona tula‘i ai lea o Eseta ma tu atu i luma o le tupu,
5. ‘ona ia fai atu lea, “‘Āfai e lelei i le tupu, ‘āfai fo‘i ‘ua alofaina a‘u e ia, ma ‘ua tonu lenei mea i le finagalo o le tupu, ma ‘ua fiafia o ia ‘iā te a‘u, ‘ia tusia ‘ina ‘ia liliu‘eseina tusi o le manatu a Hamanu le atali‘i o Hametatu, o lo sa Akakō, o lē na tusi atu ‘ina ‘ia fano sa Iutā, o ē o i ai i itū mālō uma o le tupu;
6. auā ‘ou te mafaia fa‘apefea ‘ona ‘ou va‘ai atu i le leaga o le a o‘o i lo‘u nu‘u? ‘ou te mafaia fa‘apefea ‘ona ‘ou va‘ai atu i le fanoga o lo‘u ‘āiga?”
7. ‘Ona fai mai lea o le tupu o Asueru i le masiofo o Eseta, ma Moretekai o lo sa Iutā, “Fa‘auta, ‘ua ‘ou tu‘uina atu ‘iā Eseta le fale o Hamanu, ‘ua latou fa‘atautau fo‘i ‘iā te ia i le la‘au, auā ‘ua na fa‘ao‘o lona lima i sa Iutā.
8. ‘Inā tusi fo‘i ‘ia ‘oulua ‘ona o sa Iutā, faitalia ‘oulua se mea e tusi i le igoa o le tupu, ma ‘ia fa‘amaufa‘ailogaina i le mama a le tupu; auā o le tusi ‘ua tusia i le igoa o le tupu, ma fa‘amaufa‘ailogaina i le mama a le tupu e lē mafai ona liliu‘eseina.”
9. ‘Ona vala‘auina lea o ē tusi‘upu a le tupu i lenā lava itū aso i le tolu o masina, o le masina lea o Sevana, i lona aso e lua sefulu ma le tolu; ‘ona tusia lea o mea uma e pei ‘ona fai atu ai o Moretekai e avatu i sa Iutā ma ali‘i sili ma ē pule i nu‘u ma ali‘i e pule i itū mālō e gata mai i Initia e o‘o atu i Aitiope, o itū mālō e tasi le selau ma le lua sefulu ma le fitu; na tusi atu i lea itū mālō ma lea itū mālō e tusa ma a latou tusilima, ma lea nu‘u ma lea nu‘u e tusa ma a latou gagana, o sa Iutā fo‘i e tusa ma la latou tusilima ma la latou gagana.
10. ‘Ua ia tusi atu fo‘i i le igoa o le tupu o Asueru, ma fa‘amaufa‘ailogaina ai i le mama a le tupu; ‘ona molia atu lea o ia tusi ē ‘ua tele vavave ē na ti‘eti‘e i solofanua, o ē na ti‘eti‘e i manu tele vavave, ma falata, o tama ia a solofanua fafine.
11. Auā ‘ua tu‘uina atu e le tupu i sa Iutā o ē ‘ua i lea ‘a‘ai ma lea ‘a‘ai, ‘ia latou potopoto, ma tete‘e atu ia ola ai i latou; ‘ia fa‘aumatia, ‘ia fasiotia, ma fano o tau uma a le nu‘u ma le itū mālō o ē fa‘asauā mai ‘iā te i latou, o tamaiti ‘atoa ma fafine, ma ‘ia vetea a latou mea,
12. i le aso e tasi ‘ia fai ai i itū mālō uma o le tupu o Asueru, o le aso e tasi le sefulu ma le tolu o le masina e sefulu ma le lua o le masina lea o Atara.
13. O le ata lenei o lea tusi: O le tupu mamalu o Asueru o lo‘o ofo alofa atu i faipule sili o itūmālō e selau lua sefulu ma le fitu pau mai Initia pau mai Aitiope, e fa‘apea fo‘i i latou ‘ua fa‘amaoni i lo matou mālō. E amio fa‘asausili ni isi e to‘atele pe a latou maua se mamalu tele mai tagata e so‘ona agalelei atu ‘iā te i latou.
14. E lē gata ‘ona latou fia fa‘asaunoa i tagata o lo matou mālō, ‘ae peita‘i ‘ua latou taupulepule i le ola o ē agalelei ‘iā te i latou e peiseaī ‘ua lē lava le manuia ‘ua o‘o mai ‘iā te i latou.