Feagaiga Tuai

Feagaiga Fou

Eseta 8:1-8 O LE TUSI PA'IA - Ekalesia Katoliko Roma (RSCB)

1. O lenā lava aso na foa‘iina atu ai e le tupu o Asueru mo le masiofo o Eseta, le fale o Hamanu o lē na ita i sa Iutā. ‘Ua alu atu fo‘i Moretekai i luma o le tupu, auā ‘ua ta‘u atu e Eseta la te ‘āiga.

2. ‘Ona tō ‘ese ai lea e le tupu o lana mama ‘ua ia ‘ave‘eseina ia Hamanu, ma na tu‘uina atu ai ‘iā Moretekai. ‘Ua tofia fo‘i Moretekai e Eseta e pule i le fale o Hamanu.

3. ‘Ona toe tautala atu lea o Eseta i le tupu, ‘ua ia fa‘apa‘ū fo‘i i luma o ona vae ma tagi, ma ‘ai‘oi ‘iā te ia, ‘ia fa‘aliliu‘eseina e ia le leaga a Hamanu o lo sa Akakō, ma lana manatu na ia manatu ai i sa Iutā.

4. ‘Ona fa‘aloaloa mai lea e le tupu o le to‘oto‘o auro ‘iā Eseta. ‘Ona tula‘i ai lea o Eseta ma tu atu i luma o le tupu,

5. ‘ona ia fai atu lea, “‘Āfai e lelei i le tupu, ‘āfai fo‘i ‘ua alofaina a‘u e ia, ma ‘ua tonu lenei mea i le finagalo o le tupu, ma ‘ua fiafia o ia ‘iā te a‘u, ‘ia tusia ‘ina ‘ia liliu‘eseina tusi o le manatu a Hamanu le atali‘i o Hametatu, o lo sa Akakō, o lē na tusi atu ‘ina ‘ia fano sa Iutā, o ē o i ai i itū mālō uma o le tupu;

6. auā ‘ou te mafaia fa‘apefea ‘ona ‘ou va‘ai atu i le leaga o le a o‘o i lo‘u nu‘u? ‘ou te mafaia fa‘apefea ‘ona ‘ou va‘ai atu i le fanoga o lo‘u ‘āiga?”

7. ‘Ona fai mai lea o le tupu o Asueru i le masiofo o Eseta, ma Moretekai o lo sa Iutā, “Fa‘auta, ‘ua ‘ou tu‘uina atu ‘iā Eseta le fale o Hamanu, ‘ua latou fa‘atautau fo‘i ‘iā te ia i le la‘au, auā ‘ua na fa‘ao‘o lona lima i sa Iutā.

8. ‘Inā tusi fo‘i ‘ia ‘oulua ‘ona o sa Iutā, faitalia ‘oulua se mea e tusi i le igoa o le tupu, ma ‘ia fa‘amaufa‘ailogaina i le mama a le tupu; auā o le tusi ‘ua tusia i le igoa o le tupu, ma fa‘amaufa‘ailogaina i le mama a le tupu e lē mafai ona liliu‘eseina.”

Faitau le mataupu e atoatoa Eseta 8