7. o le mea lea, fa‘auta, ‘ou te fa‘aloaloa ai lo‘u lima i luga ‘iā te oe ma ‘ou tu‘uina atu oe e fai ma vete mo nu‘u ‘ese, ‘ou te vavae ‘ese ‘iā te oe i nu‘u, e fano fo‘i oe ‘iā te a‘u ai atunu‘u; ‘ou te fa‘aumatia oe; ‘ona e iloa ai lea o a‘u lava o le ALI‘I.
8. ‘Ua fa‘apea ‘ona fetalai mai o le Ali‘i le ATUA: ‘Ua fai mai Moapi ma Seira, Fa‘auta, e tusa le ‘āiga o Iuta ma nu‘u uma.
9. O le mea lea, fa‘auta, ‘ou te fa‘aavanoaina ai le itū o Moapi i ‘a‘ai, o ona ‘a‘ai fo‘i i ona tuā‘oi, o le matagofie fo‘i o le nu‘u, o Petesemota, o Paalameona, ma Kiriataima;
10. ‘ou te fa‘aavanoa ai i tagata mai sasa‘e ma ‘ou tu‘uina atu ai e fa‘atasi ma le fānauga a Amoni e fai mo latou tofi, ‘ina ‘ia lē toe manatua le fānauga a Amoni i nu‘u.
11. ‘Ou te fa‘asalaina fo‘i ‘iā Moapi; ‘ona latou iloa ai lea o a‘u lava o le ALI‘I.
12. ‘Ua fa‘apea ‘ona fetalai mai o le Ali‘i le ATUA: ‘Ua matuā taui ma sui e Etoma i le ‘āiga o Iuta, ma ‘ua matuā nofo sala lava, ‘ua latou taui atu lava ‘iā te i latou;
13. o le mea lea ‘ua fa‘apea ‘ona fetalai mai ai o le Ali‘i le ATUA, ‘Ou te fa‘aloaloa atu fo‘i lo‘u lima i luga o Etoma ma ‘ou fa‘aumatia tagata ‘atoa ma manu o i ai; ‘ou te fa‘atafunaina ai, e pau mai i Timanu, e pau atu i Titana, e oti i latou i le pelu.
14. ‘Ou te fa‘ao‘o fo‘i le taui ‘iā Etoma i le lima o lo‘u nu‘u o Isaraelu; latou te faia ‘iā Etoma e tusa ma lo‘u ita, e tusa fo‘i ma lo‘u ita tele, latou te iloa ai le taui mai ‘iā te a‘u, o lo‘o fetalai mai ai le Ali‘i le ATUA.
15. ‘Ua fa‘apea ‘ona fetalai mai o le Ali‘i le ATUA: ‘Ua taui atu e Filisitia, ‘ua matuā taui ma sui ma le ‘ino‘ino o le loto e fa‘aumatia ai i le itatu‘u;