20. ‘Inā totofi ia se ala e o‘o mai ai le pelu i Rapa o le fānauga a Amoni ma Iuta i Ierusalema ‘ua nofo ‘olo.
21. Auā na tu le tupu o Papelonia i fetaulaigāala i le mea e vala lua ai le ala, e fai togafiti fa‘ataulāitu, na ia lūlūina ana ū fanafana, na ia fesili atu i tupua, na ia iloilo i le ate.
22. Na i lona itū taumatau le togafiti fa‘ataulāitu ‘iā Ierusalema e fa‘atū atu ai mea e lepeti a‘i, e tautala atu ai i le tau‘a, e ‘alalaga atu ai ma le leo tele, e fa‘atū atu i faitoto‘a o mea e lepeti a‘i, e tanu ai se mea mauti‘eti‘e ma fai ai se ‘olo.