1. ‘Ua o‘o mai fo‘i le afioga a le ALI‘I ‘iā te a‘u, ‘ua fa‘apea mai:
2. Le atali‘i e o le tagata, ia fa‘asaga ou mata i Ierusalema ma fa‘apa‘ū atu lau ‘upu i mea pa‘ia, ma ē vavalo atu i le lau‘ele‘ele o Isaraelu,
3. ma e fai atu i le lau‘ele‘ele o Isaraelu, O lo‘o fa‘apea ‘ona fetalai mai o le ALI‘I: Fa‘auta, ‘ua ‘ou fai oe mo‘u fili, ‘ou te tō a‘e la‘u pelu a‘i lona fa‘amoega, ma ‘ou fa‘aumatia lē na amiotonu ma lē ‘ua amio leaga ‘ua ‘iā te oe.
4. O le a ‘ou fa‘aumatia le ‘ua amiotonu ma le ‘ua amio leaga ‘ua ‘iā te oe, o le mea lava lea e alu atu ai la‘u pelu a‘i lona fa‘amoega i tagata uma, e pau mai i le itū i saute, e pau mai i le itū i matū;
5. e iloa ai e tagata uma, o a‘u o le ALI‘I, ‘ua ‘ou tōina a‘e la‘u pelu a‘i lona fa‘amoega; e lē toe fo‘i ane ai lava.
6. O oe fo‘i, le atali‘i o le tagata, ‘ia e mapuitigā ‘ona ‘ua gau o lou pāpātua; ‘ia e mapuitigā ma le ‘o‘ono tele i o latou luma.
7. A latou fai mai fo‘i ‘iā te oe, “Pe se a le mea ‘e te mapuitigā ai?” ‘E te tali atu, “‘Ona o le tala, auā o le a o‘o mai; e liu suāvai loto uma, e vaivai lima uma, e fa‘avaivai loto uma, o liu suāvai fo‘i tulivae uma; fa‘auta, o lo‘o sau, e fa‘ataunu‘uina lava,” o lo‘o fetalai mai ai le Ali‘i le ATUA.
8. ‘Ua o‘o mai fo‘i le afioga a le ALI‘I ‘iā te a‘u, ‘ua fa‘apea mai:
9. Le atali‘i e o le tagata, ‘ia e vavalo, ‘ia fa‘apea atu, O lo‘o fa‘apea ‘ona fetalai mai o le ALI‘I, Fai atu ia:O le pelu, o le pelu ‘ua fa‘ama‘aia ma ‘ua fa‘apupulaina.
10. ‘Ua fa‘ama‘aia ‘ina ‘ia tele ai le fasi,‘ua fa‘apupulaina, ia pupula.A tatou ‘oli‘oli ‘ea?O le to‘oto‘o o lo‘u atali‘i ‘ua fa‘alēaogāina ai la‘au uma.
11. ‘Ua ia avatu ai ‘ia fa‘apupulaina,‘ina ‘ia uma i le lima;‘ua fa‘ama‘aia lenei pelu ma ‘ua fa‘apupulaina‘ina ‘ia tu‘uina atu i le lima o lē na te fasioti.
12. ‘Alaga ia ma uiō, le atali‘i e o le tagata,auā e i ai ia i lo‘u nu‘u,e i ai i ali‘i sili uma o Isaraelu.‘Ua tu‘uina atu i latou i le pelu fa‘atasi ma lo‘u nu‘u;o le mea lea ia e pōpō ai i lou vae.
13. Auā ‘ua tofotofoina ia.I le fa‘apefea pe a fa‘alēaogāina le to‘oto‘o e le pelu? E mavae lava ia,o lo‘o fetalai mai ai le Ali‘i le ATUA.
14. O oe na fo‘i, le atali‘i o le tagata,‘ia e vavalo atu ma ‘ia e pati limama ‘ia fo‘i fa‘alua le pelu,‘ia fa‘atolu lava.O le pelu ‘ua oti ai e ‘ua fasia;o le pelu lea o le ‘ua fasia,le ‘ua sili, e puipui atu ‘iā te i latou.
15. ‘Ua ‘ou tu‘u atu le pelu mata‘utia i o latou faitoto‘a uma,‘ina ‘ia fa‘avaivai ai o latou loto ma ‘ia fa‘ateleina le malaia.Auē! ‘ua fa‘apupulaina ia,‘ua saunia e fasi a‘i.
16. Alu ia i lea itū po o lea itū, o le itū taumatau,po o le itū tauagavale, so se mea ‘ua fa‘asaga i ai ou mata.