Amosa 1 O LE TUSI PA'IA - Ekalesia Katoliko Roma (RSCB)

O le To‘asā o le Atua ‘iā Suria ma isi Nu‘u

1. O ‘upu a Amosa o lē na i ai i le ‘au fagamanu i Tikoa, na ia iloa ai ‘iā Isaraelu, i ona po o Usia le tupu o Iuta, o ona po fo‘i o Ierepoamo le atali‘i o Ioasa, le tupu o Isaraelu; e lua tausaga na vā a‘i lea mea i le o‘o mai le mafui‘e.

2. ‘Ua ia fa‘apea mai:E leo tele mai le ALI‘I mai Siona,e tulei ifo fo‘i lona si‘ufofoga mai Ierusalema.E fa‘anoanoa fo‘i mea e tata‘a ai manu a ē fagamanu,e mago fo‘i le tumutumu o Karamelu.

O le Fa‘amasinoga o Nu‘u tu Tuā‘oi

Suria

3. O lo‘o fa‘apea mai le ALI‘I: E tolu agasala a Tamaseko, e fa fo‘i, ‘ou te lē liliu ‘ese ai lana sala; auā na latou solia ‘iā Kiliata i u‘amea e soli ai saito.

4. ‘Ae ‘ou te tu‘uina atu le afi i le fale o Asaeli, e fa‘aumatia ai fo‘i maota o Peniata.

5. ‘Ou te gauia fo‘i le fa‘amaufa‘alava o Tamaseko, ‘ou te fa‘aumatia lē ‘ua mau i le vanu o Avene, ‘atoa ma lē ‘ua u‘u le to‘oto‘o i Pete-etena; e tāfea fo‘i le nu‘u o Suria i Kira, o lo‘o fetalai mai ai le ALI‘I.

Filisitia

6. O lo‘o fa‘apea mai le ALI‘I: E tolu agasala a Kasa, e fa fo‘i, ‘ou te lē liliu ‘ese ai lana sala; auā na latou fa‘atāfeaina le tāfeaga ‘ato‘atoa ‘ia tu‘uina atu ai i Etoma.

7. ‘Ae ‘ou te tu‘uina atu le afi i le pā o Kasa, e fa‘aumatia ai ona maota.

8. ‘Ou te fa‘aumatia fo‘i lē ‘ua mau i Asetota, ma lē ‘ua u‘u le to‘oto‘o i Asekelona; ‘ou te liliu atu lo‘u lima i Ekerona, e fano ē ‘ua totoe o Filisitia, o lo‘o fetalai mai ai le Ali‘i le ATUA.

Turo

9. O lo‘o fa‘apea mai le ALI‘I: E tolu agasala a Turo, e fa fo‘i, ‘ou te lē liliu ‘ese ai lana sala; auā na latou tu‘uina atu le tāfeaga ‘ato‘atoa i Etoma, mōna ‘ua lē manatua le feagaiga a uso.

10. ‘Ae ‘ou te tu‘uina atu le afi i le pā o Turo, e fa‘aumatia ai ona maota.

Etoma

11. O lo‘o fa‘apea mai le ALI‘I: E tolu agasala a Etoma, e fa fo‘i, ‘ou te lē liliu ‘ese ai lana sala; auā na ia tuliloa i le pelu lona uso, na ia le alofa lava, na saei pea lava lona ita; na ia tausi pea lava lona ita tele.

12. ‘Ae ‘ou te tu‘uina atu le afi i Timanu, e fa‘aumatia ai maota o Posara.

Amoni

13. O lo‘o fa‘apea mai le ALI‘I: E tolu agasala a le fānauga a Amoni, e fa fo‘i, ‘ou te lē liliu ‘ese ai lana sala; auā na latou fa‘atiau i fafine totō i Kiliata, ‘ina ‘ia fa‘ateleina e i latou lo latou lau‘ele‘ele.

14. ‘Ae ‘ou te tutu se afi i le pā o Rapa, e fa‘aumatia ai ma le ‘alaga ona maota, i le aso e tau ai le tau‘a, ma le afi i le aso e i ai le asiosio.

15. E alu i le tāfeaga Malekama, o ia ‘atoa ma ali‘i ‘ua ‘iā te ia fa‘atasi ma ia, o lo‘o fetalai mai ai le ALI‘I.