25. ‘Ua alu atu o ia i Ierusalema e fa‘afetaia‘i i le tupu; ‘ona fai atu lea o le tupu ‘iā te ia, “Mefiposeta e, se a le mea na tā lē ō ai ma a‘u?”
26. ‘Ua fai mai o ia, “Lo‘u ali‘i e le tupu, na pelogia a‘u e la‘u ‘au‘auna; auā na fai ane lau ‘au‘auna, ‘‘ou te fa‘anofoaina le asini mo a‘u, ‘ou te ti‘eti‘e ai, ma ‘ou alu atu i le tupu;’ auā ‘ua pipili la‘u ‘au‘auna.
27. ‘Ua tu‘ua‘iina fua lau ‘au‘auna i lo‘u ali‘i le tupu; ‘ae tusa lo‘u ali‘i le tupu ma se agelu a le Atua; o lenei, fai ia se mea ‘e te finagalo i ai;
28. auā sa leai se tasi i le ‘āiga uma o lo‘u tamā, na o tagata e tatau ‘ona oti i luma o lo‘u ali‘i le tupu, a ‘ua e tofia lau ‘au‘auna fa‘atasi ma ē ‘a‘ai i lau lava la‘o‘ai; se a sa‘u mea e toe tatau ai ‘ona ‘ou toe tagi atu ai i le tupu?”
29. ‘Ona fai atu lea o le tupu ‘iā te ia, “Se a le mea ‘e te toe fai mai ai i au mea? ‘ua ‘ou fai atu, o oe ma Sipa lua te vaeluaina le fanua.”
30. ‘Ua fai mai Mefiposeta i le tupu, “‘Ave pea ia mea uma lava ma ia; tau ‘ina ‘ua o‘o mai lo‘u ali‘i le tupu ma le manuia i lona fale.”
31. O Pasili fo‘i le Kiliata, ‘ua alu ifo o ia nai Rokeli; ‘ua la sopo‘ia atu Ioritana, ma le tupu ‘ina ‘ia momoli ‘iā te ia i Ioritana.
32. ‘Ua matuā toeaina lava Pasili, ‘ua valugafulu ona tausaga; o ia lava na fagaina le tupu ‘ina o nofo o ia i Maanaima, auā o le ali‘i tele lava o ia.
33. ‘Ona fai atu lea o le tupu ‘iā Pasili, “Tā te ō ma a‘u, tā te mafuta fa‘atasi ma a‘u i Ierusalema.”
34. A ‘ua fai mai Pasili i le tupu, “E fia ni aso o tausaga o lo‘u olaga o totoe, tā te ō a‘e ai ma oe le tupu i Ierusalema?
35. ‘Ua valugafulu o‘u tausaga i lenei aso; e iloa ‘ea e a‘u se lelei ma se leaga? e lagona ‘ea e lau ‘au‘auna ni a‘u mea e ‘ai ma ni a‘u mea e inu? ‘ou te toe lagona ‘ea le leo o tane pepese ma fafine pepese? Se a le mea e toe fa‘atigā ai lo‘u ali‘i le tupu e lau ‘au‘auna?