1. ‘Ona ta‘uina atu lea ‘iā Ioapo, “Fa‘auta, o lo‘o tagi ma fa‘anoanoa le tupu ‘iā Apisaloma.”
2. ‘Ona ‘avea lea o le manumālō i lea aso ma mea e fa‘anoanoa ai i le nu‘u uma; auā ‘ua fa‘alogo le nu‘u i lea aso, ‘ua fa‘apea, “‘Ua tigā le tupu ‘ona o lona atali‘i.”
3. ‘Ua ō fa‘agaoi le nu‘u i lea aso i le ‘a‘ai, e pei ‘ona e fa‘agaoi le nu‘u ‘ua māsiasi ‘ina ‘ua sōsōla i le tau‘a.
4. ‘Ua ufiufi e le tupu ona fofoga; ‘ua ‘alaga fo‘i le tupu ‘ua leo tele, “Lo‘u atali‘i Apisaloma e, Apisaloma lo‘u atali‘i e, lo‘u atali‘i e!”