9. ‘Ona ō mai lea o Sera le Aitiope ma ‘au e afe o afe ma kariota e tolu selau e tau ma i latou; na ō mai fo‘i i Maresa.
10. ‘Ona alu atu lea o Asa e tau ma ia ma ‘ua latou tofia le tau‘a i le vanu o Sefata i Maresa.
11. ‘Ona vala‘au atu lea o Asa i le ALI‘I lona Atua, ‘ua fa‘apea atu, “Le ALI‘I e, e lē se mea faigatā ‘iā te oe ‘ona fesoasoani i ē to‘atele, po o i latou ‘ua leai se malosi. Le ALI‘I e, lo matou Atua, ‘ia e fesoasoani mai ‘iā te i matou; auā matou te fa‘alagolago ‘iā te oe, ‘ua matou ō atu i lou suafa lava e tau ma lenā to‘atele. Le ALI‘I e, o oe lava lo matou Atua; ‘aua ne‘i manumālō mai tagata ‘iā te oe.”
12. ‘Ona fasia lea e le ALI‘I o Aitiope i luma o Asa ma luma o Iuta; ‘ona sōsōla ai lea o Aitiope.
13. ‘Ua tulimuli‘au ‘iā te i latou e Asa ma le nu‘u sa ‘iā te ia ‘ua o‘o i Kira; ‘ua fasia Aitiope, ‘ua leai so latou olataga; auā sa fa‘aumatia i latou i luma o le ALI‘I ma luma fo‘i o lana itūtau‘a; ‘ua latou ‘ave fo‘i vete e matuā tele.
14. ‘Ua fasia fo‘i e i latou o ‘a‘ai uma na vagavagai i Kira; auā ‘ua o‘o ‘iā te i latou le mata‘u i le ALI‘I; ‘ua vetea e i latou o ‘a‘ai uma; auā ‘ua matuā tele le vete sa i ai.