28. O Ierepoamo fo‘i, o le toa malosi ia; ‘ua iloa e Solomona o le taule‘ale‘a to‘aga ia, ‘ona ia tofia lea o ia e pule i galuega uma e faia e le ‘āiga o Iosefa.
29. O ona po ia na alu atu ai Ierepoamo nai Ierusalema, na iloa o ia i le ala e le perofeta o Akia o le Sailo; na ‘ofu fo‘i o ia i le ‘ofu fou, ‘ua na o i lā‘ua i le vao.
30. ‘Ona tago lea o Akia i le ‘ofu fou sa ‘ofu ai o ia ma saei ai i saega‘ofu e sefulu ma le lua.
31. ‘Ona fai atu ai lea o ia ‘iā Ierepoamo, “‘Inā ‘ave ia mo oe saega e sefulu, auā o lo‘o fa‘apea mai le ALI‘I le Atua o Isaraelu, Fa‘auta, ‘ou te saeia le mālō a‘i le pule a Solomona, ma ‘ou foa‘i atu ‘iā te oe itū‘āiga e sefulu;
32. ‘ae peita‘i e i ai ‘iā te ia le itū‘āiga e tasi ‘ona o la‘u ‘au‘auna o Tavita, ‘ona o Ierusalema fo‘i o le ‘a‘ai na ‘ou filifilia i itū‘āiga uma o Isaraelu.
33. Auā ‘ua latou lafoa‘i ‘iā te a‘u ma ‘ua latou ifo ‘iā Asaira le atua fafine o sa Saitonū ma Kimosa le atua o Moapi ma Melekoma le atua o le fānauga a Amoni; e le‘i sāvavali fo‘i i latou i o‘u ala e fai ai mea tonu i o‘u luma, ma ‘ana‘ana i a‘u tulafono ma a‘u fa‘amasinoga, e pei o lona tamā o Tavita.
34. ‘Ae ‘ou te lē ‘ave ‘ese le mālō uma ‘iā te ia; auā ‘ou te faia o ia ma ali‘i i aso uma o lona ola, ‘ona o la‘u ‘au‘auna o Tavita na ‘ou filifilia; auā na ia tausi i a‘u poloa‘iga ma a‘u tulafono.
35. ‘Ae ‘ou te ‘ave ‘ese le mālō i lona atali‘i ma ‘ou foa‘iina atu ‘iā te oe o itū‘āiga e sefulu.
36. ‘Ou te foa‘iina atu fo‘i i lona atali‘i le itū‘āiga e tasi, ‘ina ‘ia i ai i la‘u ‘au‘auna o Tavita le lamepa e lē aunoa i o‘u luma i Ierusalema le ‘a‘ai na ‘ou filifilia mo a‘u e tu‘u ai lo‘u igoa.
37. ‘Ou te ‘ave fo‘i oe, ‘e te pule i mea uma e mana‘o i ai lou loto, e fai fo‘i oe ma tupu ‘iā Isaraelu.
38. ‘Āfai fo‘i ‘e te fa‘alogo i mea uma ‘ou te fai atu ai ‘iā te oe ma e savali i o‘u ala ma e faia mea tonu i o‘u luma, ‘ina ‘ia e tausi i a‘u tulafono ma a‘u poloa‘iga, e pei ‘ona faia e la‘u ‘au‘auna o Tavita; ‘ona ‘ou i ai lea ‘iā te oe ma ‘ou fai fo‘i mo oe le ‘āiga tumau, e fa‘apei ‘ona ‘ou faia mo Tavita, ‘ou te foa‘iina fo‘i o Isaraelu ‘iā te oe.
39. ‘Ou te fa‘atigāina fo‘i le fānau a Tavita ‘ona o lenei mea, ‘ae lē o‘o i le fa‘avavau.”
40. ‘Ona lamalama ai lea e Solomona ‘ia fasioti ‘iā Ierepoamo. ‘Ona tula‘i ai lea o Ierepoamo ma sola atu i Aikupito ‘iā Seseka le tupu o Aikupito; sa i Aikupito fo‘i o ia ‘ua o‘o i le oti o Solomona.
41. O toe o mea na faia e Solomona ma mea uma na ia saunia ma lona poto, ‘ua lē tusia ‘ea ia i le tusi i mea na faia e Solomona?
42. O tausaga na fai ai Solomona ma tupu ‘iā Isaraelu uma lava i Ierusalema e fagafulu o tausaga ia.
43. ‘Ona ta‘oto ai lea o Solomona fa‘atasi ma ona tamā, ‘ua tanumia fo‘i o ia i le ‘a‘ai a Tavita lona tamā; ‘ona soloa‘i ane lea o Reopoamo lona atali‘i e fai ma tupu.#