12. O lenei, ‘inā sau ia, so‘u fa‘atonu atu ‘iā te oe, ‘ina ‘ia fa‘aola oe ‘iā te oe ma lau tama o Solomona.
13. Alu ia oe ma e ulufale atu i le tupu o Tavita, ma e fai atu i ai, ‘Le ali‘i e, le tupu, na e le tautō mai ‘ea ‘iā te a‘u lau ‘au‘auna fafine, ‘ua fa‘apea mai: E moni, e fai la‘u tama o Solomona ma tupu pe a mavae atu a‘u, e ti‘eti‘e fo‘i o ia i lo‘u nofoāli‘i; se a fo‘i le mea ‘ua fai ai Atonia ma tupu?’
14. Fa‘auta mai ia, a o tautalatala ai ‘oulua ma le tupu ‘ou te alu atu fo‘i e mulimuli ‘iā te oe ma ‘ou fa‘amaonia au ‘upu.”
15. ‘Ona alu atu ai lea o Patesepa i le tupu i lona potu, ‘ua toeaina lava le tupu; ‘ua ‘au‘auna fo‘i Apiseka le Sunema i le tupu.
16. ‘Ona punou ai lea o Patesepa ma ifo atu i le tupu. ‘Ona fai mai lea o le tupu, “Se a ‘ea lou mana‘o?”
17. ‘Ona fai atu lea o ia ‘iā te ia, “Le ali‘i e, na e tautō i le ALI‘I lou Atua i lau ‘au‘auna fafine, na fa‘apea mai: E moni, e fai la‘u tama o Solomona ma tupu pe a mavae atu a‘u, e ti‘eti‘e fo‘i o ia i lo‘u nofoāli‘i.
18. O lenei, fa‘auta, o lo‘o fai ma tupu Atonia, a o oe le ali‘i e, le tupu, ‘ua e lē silafia.
19. ‘Ua fafasi fo‘i e ia o povi ma manu pepeti ma mamoe e tele lava, ‘ua ia tala‘iina fo‘i o atali‘i uma lava o le tupu ma Aviata le ositaulaga, ma Ioapo le pule i ‘au; a o Solomona lau ‘au‘auna ‘ua ia le tala‘iina.
20. A o oe le ali‘i e, le tupu, o lo‘o fa‘asagasaga Isaraelu uma ‘iā te oe, ‘ina ‘ia e fa‘asino mai ‘iā te i latou po o ai e ti‘eti‘e i le nofoāli‘i o lo‘u ali‘i le tupu pe a mavae atu o ia.
21. A leai, ‘ona ta‘uagasalaina lea o i mā‘ua ma la‘u tama o Solomona, pe a ta‘oto lo‘u ali‘i le tupu fa‘atasi ma ona tamā.”
22. Fa‘auta, o tautalatala i lā‘ua ma le tupu, ‘ua ulufale atu Natano le perofeta.
23. ‘Ona latou ta‘u atu lea i le tupu, ‘ua fa‘apea atu, “Fa‘auta, o Natano le perofeta.” ‘Ua ulufale atu o ia i luma o le tupu, ‘ona ifo to‘ele lea o ia i luma o le tupu.
24. ‘Ona fai atu lea o Natano, “Le ali‘i e, le tupu, po ‘ua e fetalai ‘ea, ‘E fai Atonia ma tupu pe a mavae atu a‘u, e ti‘eti‘e fo‘i o ia i lo‘u nofoāli‘i?’
25. Auā ‘ua alu ifo o ia i le aso nei ma ‘ua fafasi i povi ma manu pepeti ma mamoe e tele lava; ‘ua tala‘iina fo‘i e ia o atali‘i uma o le tupu, ma ē ‘avea ‘au ma Aviata le ositaulaga; fa‘auta fo‘i, ‘ua latou ‘a‘ai ma feinu i ona luma ma ‘ua fa‘apea ane, ‘‘Ia soifua le tupu o Atonia.’
26. A o a‘u nei lau ‘au‘auna ma Satoka le ositaulaga, o Penaia fo‘i le atali‘i o Ieoiata, ma lau ‘au‘auna o Solomona ‘ua ia lē tala‘iina.
27. Po ‘ua faia ‘ea lenei mea e lo‘u ali‘i le tupu, a ‘e te le‘i fa‘ailoa mai i lau ‘au‘auna po o ai e ti‘eti‘e i le nofoāli‘i o lo‘u ali‘i le tupu pe a mavae atu o ia?”
28. ‘Ona tali mai lea o le tupu o Tavita, ‘ua fa‘apea mai, “‘Inā vala‘au atu ia ‘iā Patesepa e sau ‘iā te a‘u.” ‘Ona sau lea o ia i luma o le tupu, ‘ua tu fo‘i i luma o le tupu.