9. Sa fa‘apea i Isaraelu anamua le ‘upu a le tagata e alu e fesili i le Atua, “Ō mai ia, ‘inā tatou ō i le tagata va‘ai,” auā o le perofeta i nei ona po, sa ta‘ua o ia anamua o le tagata va‘ai.
10. ‘Ua fai atu Saulo i lana ‘au‘auna, “‘Ua lelei lau ‘upu; sau ia, ‘inā tā ō.” ‘Ona la ō lea i le ‘a‘ai o i ai le tagata o le Atua.
11. ‘Ua ō a‘e i lā‘ua i le ā‘ega o le ‘a‘ai, ‘ona latou fetaia‘i lea ma teine, o lo‘o ō i latou e utu vai; ‘ua la fai atu ‘iā te i latou, “O ai ‘ea le tagata va‘ai i le mea nei?”
12. ‘Ona latou tali mai lea ‘iā te i lā‘ua, ‘ua fa‘apea mai, “O lo‘o i ai lava, fa‘auta, o lo‘o i ou luma; o lenei, ‘ia vave ia, auā na sau o ia i le aso nei i le ‘a‘ai, auā o le taulaga a le nu‘u e fai i le asō i le mea maualuga.
13. A ‘oulua o‘o i le ‘a‘ai, ‘ona ‘oulua maua loa lea o ia, a o le‘i alu a‘e i le mea maualuga e ‘ai ai; auā e lē ‘a‘ai le nu‘u se‘ia alu atu o ia, auā o ia na te fai le fa‘afetai i le taulaga, a uma lea, ‘ona ‘a‘ai lea o ē ‘ua togia; ō a‘e ia, auā lua te maua atu ‘iā te ia i le asō.”
14. ‘Ona ō a‘e lea o i lā‘ua i le ‘a‘ai; o lo‘o ō atu i totonu o le ‘a‘ai, fa‘auta fo‘i, o lo‘o sau Samuelu ‘ua fetaia‘i o ia ma i lā‘ua i lona alu a‘e i le mea maualuga.
15. Na ta‘u atu e le ALI‘I i taliga o Samuelu i le aso na tuā‘oi ma lē na alu atu ai Saulo, ‘ua fa‘apea,
16. “E fa‘apenei le itū aso taeao ‘ou te ‘auina atu ai ‘iā te oe le tagata mai le nu‘u o Peniamina, ‘e te fa‘au‘u ‘iā te ia e fai ma ali‘i o lo‘u nu‘u o Isaraelu; na te fa‘aola fo‘i i lo‘u nu‘u nai lima o Filisitia; auā ‘ua ‘ou va‘ai atu i lo‘u nu‘u, ‘ina ‘ua o‘o mai ‘iā te a‘u lo latou ‘alalaga.”
17. ‘Ua iloa mai Saulo e Samuelu, ‘ona ta‘u atu lea e le ALI‘I ‘iā te ia, “Fa‘auta, o le tagata lenā na ‘ou fai atu ai ‘iā te oe, e pule o ia i lo‘u nu‘u.”